17

ropu whawhai

Ko tā mātou i mōhio ai, i te whakahokitanga mai o mātou ki Orsogna, ko ngā Amerikana kei te whawhai whakararo mai i te raki. Ko tā rātou mahi he tukituki i te aukati i te rori ki Cassino. Inā oti tēnei i a rātou, ka neke whakamua atu te Ope Taua Tuarua o Aotearoa kia tūtaki atu ki a rātou, ā, ki te pupuri hoki i te rori kia noho puare ki te awaawa.

Engari, kāre i roa ka mōhio mātou i karawhiuwhiua ngā Amerikana i tētahi karawhiu kino i a rātou e whawhai whakararo ana mai. Ka nekeneke mai rātou mai i tētahi maunga ki tētahi maunga me te kaha o tā rātou whawhai mō ia paku whenua tata rawa mai ki kō paku atu o te whare karakia, ka tū. He poto noa iho te wā e pupuri ana rātou i tō rātou tūranga. Koinei rā te kōrero i rongo mātou.

Āe, tata tonu rātou ki te ū, engari he pakari te pupuri a te hoariri, he whakarihariha hoki te āhua o te rangi, he nui hoki ā rātou taotū nā te kaha nui ka hoki whakamuri rātou ki waho. I rongo mātou he kaha te turakitanga i ō rātou rōpū, ā, ko te toenga o ō rātou hōia i kaha tonu ki te whawhai ahakoa kua ngoikore ngā tinana, kua tino kaha te makariri, ā, ko ētahi o rātou i tōia mai ki raro o te maunga, ka whakahokia mā runga ngā moenga kawe tūroro ki te whakatipu kaha mō rātou. Ko ēnei kōrero katoa e tautoko ana i ā mātou kitenga i runga i te huarahi—ko ngā tāngata me ngā mīhini e tata kore ana e kitea.

Nā te korenga o te tukinga mai i te raki, i turaki ō mātou wawata mō tēnei pakanga. Ko tā mātou whakaaro hoki, ka noho puare mai te kūaha hei haerenga atu mō ngā wakatuki me ngā ope hōia kia oma atu ai mātou mā te Huarahi o Casilina, i runga i te Huarahi Ono, ko tēnei hoki te huarahi ki Roma. Kei te whakaaro tonu mātou he aha he mahi kē atu mā mātou. Ka taea tonutia e mātou te tatari kia pai mai ngā rangi. Ko ā mātou whakaaro rā ēnei. Tērā pea ka taea tonu e mātou te pana whakamua ahakoa he aha. Ko te kōrero a ētahi, tērā pea ka puta mai ētahi āwhina i te raki. Ka puta ngā whakaaro me tatari pea mātou mō ngā Ope Hōia o te raki. Ko te kōrero a ētahi, tērā pea ka ngotea mātou kia haere ki tētahi atu wāhi āwhina ai—i runga i te takutai o Anzio ki tētahi atu wāhi rānei i Iuropa. Ko tā rātou kōrero he moumou taima ēnei whakarite. Ko te mea pai kē kia whakarerea e mātou a Cassino.

Ko te mahi i whakaritea, i whakahoungia tō mātou Rōpū Hōia. I whakaurua mai tētahi Rōpū Hoia Iniana hei tautoko, me tētahi Rōpū mau pū. I whakaurutia mai anō hoki, tētahi rōpū wakatuki. Kua karangatia nei mātou ko te Rōpū Hōia o Aotearoa. Ko ētahi atu Rōpū i whakapiria mai ki te Aotearoa Rōpū nei nō te Rōpū waka, te Rōpū Rongoā me te Rōpū Kawe Taonga.

Ko te kōrero i puta, he nui rawa te pai o te mahi a ngā Hōia Amerikana, e kore e pai ki te waiho kia pērā noa iho, engari me tahuri tātou ki te tautoko i ērā mahi pai. Kua huri te Rōpū Whawhai o Aotearoa i tēnei wā hei Rōpū tuki e whakarite ana ki te uru atu ki roto ki te tautoko i ngā painga kua whiwhi. Kua rūhā katoa ērā o ngā Ope Whawhai ko tātou anake pea ngā hōia kei te pakari, kei te ora.

Kei te whakarite mātou ki te haere ki te pakanga ahakoa kāore anō mātou kia tino reri. Mehemea he kūaha kei mua, mā mātou tonu e whakatuwhera, ā, ko te kōrero mai hoki, kei tō mātou Ope Taua te mahi nui ki te tuki, ki te ārahi hoki i ngā wakatuki ki te whakawhiti i te awa o Rapido. Ko tēnei hoki te huarahi hou hei haerenga atu mō mātou ki Roma.

Ko te wāhi i whakaritea mō tēnei tukinga whakamua, he whenua pukepuke e kawe ana i te raina rerewē. Ko tēnei anake te whenua kei runga ake i te wai. He tahataha tēnei i hurihia hei rori pakari hei haerenga atu mō ngā wakatuki me ērā atu waka.

I pupuritia te tīmatanga o te whawhai nātemea he kino te mahi a Tawhirimātea, ā, kei te waipuke hoki. Engari, nā tēnei mahi tatari i whai wāhi ai mātou ki te tirotiro haere i te āhua o ngā mahi hei mahinga mā mātou. Ko ngā kōrero i hoki mai, kua pakaru katoa ngā piriti me ngā karapata i runga i te rori i ngā mahi a te hoariri. Ko tētahi anō o ngā mahi a te hoariri, he whakahiato haere i ngā rāpihi me ngā waka pākarukaru i runga i te huarahi. Nā te wai i whakahoro ngā huarahi, i hanga mai hoki i ētahi roto, ā, i tēnei wā, nā te kaha whakaruke o te marangai kua mākū katoa te whenua.

Ko ngā mahi waipuke nei te hoa whawhai o ā mātou hoariri. Koinei hoki te hua o te aukati wai i hangaia e rātou i ngā marama e whakareri ana rātou mō tō mātou taenga mai. Ko ngā whenua kāore i raro i te wai, kua kutere katoa, ā, e kore e taea e te waka te whakawhiti. Kei te kaha tonu te rere o te awa hōhonu o Rapido.

He tino nui atu ngā mahi hei mahinga mā ā mātou tāngata hanga piriti, hanga rori. Ko tā rātou hiahia kia tae mai ngā mīhini para whenua me ngā mīhini hanga rori kia taea ai te hanga huarahi. Ko te wā tika mō ēnei mahi huarahi ko te pō. Ko te take hoki, kei konei te hoariri e kōpikopiko ana, kei runga hoki rātou i te Maunga Ohu Whakapono nei me ā rātou pū mīhini e titiro whakararo ana.

Kia tae mai te wā ka tahuri mātou ngā hōia haere waewae o te Ope Taua Maori, ka ahu atu mā te tahataha o te rerewē ki te hūkiti i ngā hoariri i te wā e whakatika ana ngā kaimahi rori, i ngā piriti, ki te whakakī i ngā whārua, me te whakawātea i ngā rāpihi me ngā taonga pakaru o te huarahi. Ka riro i a mātou te mana whakahaere o te teihana rerewē o Cassino. Ko tā mātou mahi, he pupuri kia noho puare inā taha ana ngā wakatuki me ngā taraka i runga i tēnei huarahi hou kua hangaia nei e ngā kaimahi rori mō rātou. Awatea rawa atu, kua tae mai ngā wakatuki ki tō mātou taha i te teihana rerewē ki te āwhina i a mātou ki te pupuri i tērā wāhi. Mā rātou e whakawhānui te huarahi me te haere tonu atu ki ngā tapa o te taone o Cassino kia wātea ai mō te ope nui tonu ki te eke ki runga ki te rori kātahi mātou ka huri rauna i te maunga nui, ka haere tika atu mā te Awaawa o Liri, ahu tika atu ki Roma.

Che be-ella Roma.

Engari āwhea rawa tēnei? Te kaha nui hoki o te marangai. Te awa kutere nei hoki. He rā anō, kātahi ka taumaha te whakaheke o te marangai. Ka titiro atu mātou ki te whenua e waipuketia nei, me te mōhio tērā pea ka tāria te wā. Aua atu. Hei tētahi rā, ā tētahi atu rā tata nei, ka puta mai te kupu whakamutunga hei tuku i a mātou ki te haere. Ko te wāhi e haeretia nei e mātou ko te teihana rerewē.