Rogha Haiku
an bhfeicfidh siad a chéile anocht?
púróg shliobach
an ghealach
clog an tseipéil…
cá bhfuil a dtriall?
slua seangán
cacaíní caorach
8 … 10 … dosaen …
ar fad mar a chéile
nuair a ainmnítear é
siúd an crotal coille
i ngach aon bhall
na haghaidheanna úd
sa bhéilteach thine -
is dual dóibh athrú leis
bláthanna i vása
siúlann cat
trí gharrai lom
bonnán ceo sa chróntráth
beagán ar bheagán
an domhan ag dul as
bleibeanna tiúilipí á gcur
a ndath amach anseo
ar spéir an tráthnóna
an bhfaca sí an danse macabre
lena súile cinn?
cearc gan chloigeann
turlabhait
na dtonn
glanann smaointe
ag sciorradh thar ghoirt na maidine
beireann gá gréine
ar mhún an ghiorria
Oileán Acla
na roilligh ag stánadh
ar chuairteoirí
a bhfuil fágtha den oíche
dhá phréachán
ar ghéag
brádán maidine
colúr ag blaiseadh
d’aiseag druncaera
grág préacháin
siosarnach bambú
saolaítear an tráthnóna
ár n-iníon
dhá chroí ag bualadh inti anois
nach ait é
i mball rúnda éigin
sa chruinne
foirmítear guth an phréacháin
maidin sheaca
nochtann spideog a brollach
don saol mór
ó dhuilleog sheasc go duilleog sheasc
sneachta briosc
éitlíonn préachán leis
nach uasal é!
an capall ar an mbonn
nach airgead níos mó é
gaoth an Mhárta
teannóga ag éalú
as pota briste
péire snag breac
ar eite -
anamacha a chéile
ag bun na Croise
iompaíonn seilide fuilteach
ina bhúda
ní hé gur dearúdadh é
an t-aiteann buí
arís
grian bhuí an tráthnóna
míoltóga sa reilig
a Chríost, nach nimhneach!
fuaim lagbhuí…
coinneal á múchadh
leamhan eile slán
an é sin do ghósta
go sámh i measc na nduilleog?
gráinneog mharbh
ar saoradh a anam?
géaga an tseanchrainn
trí thine
tá na torbáin
ina ndúiseacht
dúisímis leo!
i ngloiní dú’ an daill
dul fé
na gréine
uaigh ársa –
siosarnach de phaidir
i dteanga mharbh
léargas ar dhia
i súile an chait
is leamhan á leanúint aige
mún lagbhuí
ar fhiailí glasa dorcha…
ag smaoineamh ar Santóka
an ghealach lán
líonann an tsúil
go hiomlán
piorra
á róstadh sa ghríosach
giosáil na báistí
crann líomóidí
faoi scáil –
ní hea dáiríre
cnámh ar an trá
a raibh feoil uirthi uair amháin
is a dhein cúpláil
finéal go flúirseach
agus tá guth na fuiseoige
glasuisciúil
chúb an cat
isteach inti féin –
oíche shíoraí a dhá súil
Conamara
chaitheas cat marbh thar claí
réaltaí
an solas
ón bpríosún
nach dóite
deireadh lena ndualgais…
sé sheangán bheaga
i ngob na spideoige
gealach dheirceach –
fear an ghondola ag canadh
dó féin
