Il piçul princip su la piçule stele B 6\12
Un timp lontan, cuant che o vevi sîs agns, intun libri su lis forestis di un timp lontan, intitulât “Storiis vivudis de nature”, o viodei un cetant biel dissen. Al veve piturât un sarpint boa che al gloteve un animâl. Ve chi la copie dal dissen. Al jere scrit: “I boa a inglotin la lôr prede dute interie, cence mastiâle. Daspò stant che no rivin plui a movisi a duarmin pai sîs mês che la digjestion e domande”.
O pensai a lunc su lis aventuris de Jungle.
E de bande mê o rivai a fâ il gno prin dissen. Il gno dissen numar un. E al jere cussì: “O mostrai la mê bravetât a lis personis plui grandis, ur domandai se il dissen lis spaurive. Ma mi rispuinderin: “Spaurî? Parcè mai un al varès di sêi spaurît di un cjapiel?” Il gno dissen nol jere il dissen di un cjapiel. Al jere il dissen di un sarpint boa che al digjerive un elefant. Par che viodessin in mût clâr ce che al jere, o piturai il boa par intîr. Bisugne simpri spiegâur lis robis ai grancj. Il gno dissen numar un si presentave cussì:
Cheste volte mi rispuinderin di lassâ di bande i boa, sei di fûr che dentri, e di dedicâmi invezi ae storie, ae gjeografie, ae gramatiche e ae aritmetiche. Al fo cussì che a sîs agns jo o rinunziai a chê che e varès podût jessi la mê gloriose cariere di pitôr. Il faliment dal gno dissen numar un e dal numar doi mi veve scunît. I grancj no capissin mai nuie di bessôi e i fruts si strachin a spiegâur dut ogni volte. Alore o sielzei un altri mistîr e o imparai a vuidâ i aeroplans. O ai svolât un pôc sorevie par dut il mont: e a dî il vêr la gjeografie mi à cetant judât.
A colp di voli o pues cognossi la Cine o ben la Arizone, e se un si piert inte gnot, cheste sapience e jude une vore.
O ai incuintrât cetantis personis impuartantis inte mê vite, o ai vivût a lunc intal mieç dai grancj.
Ju ai cognossûts inte lôr intimitât, ju ai cjalâts propit di dongje. Ma la opinion che o vevi di lôr no je masse miorade.
Cuant che indi incuintravi un che mi someave di sintiments vierts, o tentavi l’esperiment dal gno dissen numar un, che o ai simpri tignût di cont.
O cirivi di capî cussì se pardabon al jere une persone in stât di capî. Ma, cualsisei che al fos, un umign o une femine, mi rispuindeve: “Al è un cjapiel.”
E alore no fevelavi dal sarpint boa, di forestis un grum vieris, di stelis.
Mi sbassavi al so nivel, i fevelavi di bridge, di golf, di politiche, di golarinis. E lui al jere dut content di vê incuintrât un umign cetant sensibil.