Intal secont planet al jere a stâ un braurôs.
“Ah ah! Eco la visite di un amiradôr”, al berlà di lontan il braurôs a pene che al viodè il piçul princip.
Par chei braurins ducj i umigns a son amiradôrs.
“Bundì”, al disè il piçul princip, “ce strani cjapiel che o vês!”
“Al è fat par saludâ”, i rispuindè il braurin. Al è par saludâ cuant che mi aclamin, ma par sfortune nol passe mai nissun par chestis bandis”.
“Ah sì?” al disè il piçul princip che nol capive.
“Bat lis mans une cun chê altre”, lu conseà il braurin.
Il piçul princip al batè lis mans e il braurin cun modestie al saludà alçant il cjapiel.
Al è plui divertent de visite al re, si disè il piçul princip, e al continuà a bati lis mans une cun chê altre. E il braurin, jù a alçâ il cjapiel.
Daspò cinc minûts di chest esercizi il piçul princip si stufà di cheste naine.
“E covential alc altri di fâ”, al domandà, “par che il cjapiel nol coli?”
Ma il braurin nol intidè. Chei li no sintin altri che lis laudis.
“Ma mi amiristu tant pardabon?” i domandà al piçul princip.
“Ce vuelial dî amirâ?”
“Amirâ al vûl dî ricognossi l’om plui biel, il plui elegant, plui siôr e plui inteligjent di dut il planet”.
“Ma tu sês di bessôl chenti!”
“Fâmi chest plasê. Rimirimi instès!”
“Ti amiri”, al disè il piçul princip, alçant un pôc lis spalis, “ma ce ti vegnial?”
E il piçul princip sin lè.
Di sigûr i grancj a son straneôs, si diseve di bessôl il piçul princip, biel che al viazave.