Il setim planet al fo duncje la Tiere.
La Tiere nol è un planet cualsisei! Si contin centeundis re (cence dismenteâsi cent res neris), sietmil gjeografs, nufcentmil umigns di afârs, siet milions e mieç di cjochelis, tresintedodis milions di braurins, vâl a dî doi miliarts cirche di grancj.
Par dâus une idee des misuris de Tiere, us disarai che prime de invenzion de eletricitât si scugnive mantignî, fasint la sume dai sîs continents, une vere armade di cuatricentesessantedoimil e cinccenteundis lampionârs par impiâ i lampions. Viodût di lontan al faseve un efiet maraveôs. I moviments di cheste armade a jerin regolâts tant che un balet di une opare. Prin al vignive il turni di chei che a impiavin i lampions de Gnove Zelande e de Australie. Daspò che chescj, vint impiâts i lôr lampions, a sint lavin a durmî.
Alore a jentravin in sene chei de Cine e chei de Siberie. Po ancje lôr si platavin fra lis cuintis. Alore al tacave il turni dai lampionârs de Russie e des Indiis. Po dopo chei de Afriche e chei de Europe. Daspò chei de Americhe dal Sud e par ultins chei de Americhe dal Nord. E mai che si sbaliassin intal ordin de jentrade in sene. Al jere grandiôs.
Dome l’om che al impiave l’unic lampion dal Polo Nord, e il so compagn dal unic lampion dal Polo Sud a fasevin une vite a fâ nuie e cence pinsîrs: a lavoravin dome dôs voltis ad an.