Il piçul princip al lè su par une alte montagne. Lis solis montagnis che al ves mai viodût, a jerin i trê vulcans che i rivavin fin tai zenôi. E al doprave il vulcan studât come un sgabel. “Di une montagne alte come cheste,” si disè par cheste “o viodarai intun colp dut il planet, ducj i umigns…” Ma nol viodè altri che pichis di cret ben uçadis.
“Bundì” al disè a câs.
“Bundì… Bundì… Bundì…” al rispuindè il rivoc.
“Cui sêso?” al disè il piçul princip.
“Cui sêso?... Cui sêso?... Cui sêso?... al rispuindè il rivoc.
“Che o sedis miei amîs, jo o soi di bessôl” al disè.
“Jo o soi di bessôl…jo o soi di bessôl… jo o soi di bessôl” al rispuindè il rivoc.
“Ce planet ridicul”, alore al pensà, “al è dut sec, plen di spicis e dut salât. E i umigns a mancjin di imagjinazion. A ripetin dut ce che si ur dîs… Lì di me o vevi un flôr e al fevelave simpri par prin…”