O vevi cussì savût une seconde robe cetant impuartante! Che il so planet di nassite al jere pôc plui grant di une cjase. Dut câs chest nol podeve smaraveâmi tant. O savevi une vore ben che in plui dai grancj planets come la Tiere, Jupitar, Mart, Venere che ur jere stât dât un non, indi é a centenârs inmò che a son cussì piçui che si rive sì e no a viodiju cul telescopi.
Cuant che un astronom al scuvierç un di chescj, i da par non un numar. Lu clame par esempli: la piçule stele “3251.”
O ai un grum di resons par crodi che il planet di dulà che al vignive il piçul princip al è la piçule stele B612. Chest asteroit al è stât viodût une sole volte al telescopi di un astronom turc. Al veve fat in chê volte une grande dimostrazion de sô scuvierte a un Congrès Internazionâl di Astronomie. Ma par vie dal costum che al veve intôr, nissun i veve crodût pardabon. I grancj a son fats cussì.
Par fortune pe nomee dal asteroit B612 un ditatôr turc al comandà al so popul, sot pene di muart, di vistîsi inte maniere europeane. L’astronom al tornà a fâ la sô dimostrazion intal 1920, cuntun vistît une vore elegant. E cheste volte il mont al fo cun lui.
Se us ai contât tancj particolârs su la piçule stele numar B612 e se us ai pandût il so numar, al è propit pai grancj che a amin i numars. Cuant che ur fevelais di un gnûf amì no si interessin mai des robis essenziâls. No si domandin mai : “Cuâl isal il so timbri di vôs? Cuâi sono i soi zûcs preferîts? Fasial racuelte di paveis?”
Ma us domandin: “Ce etât aial? Trops fradis? Trop pesial? Trop vuadagnial so pari?” Alore in chê volte a crodin di cognossilu. Se voaltris o disês ai grancj:
“O ai viodude une biele cjase di modons rose, cun canelats sui barcons e un pôcs di colomps sul cuviert”, lôr no rivin a imagjinâse.
Si scuen dî “O ai viodude une cjase di cent mîl francs”, alore a berlin: “ce biele che e je.”
Cussì se voaltris ur disês: “La prove che il piçul princip al è esistût, e sta intal fat che al jere une vore biel, che al rideve e che al voleve une piore. Cuant che un al vûl une piore e je la prove che al esist.”
Beh, lôr a alçaran lis spalis, e us trataran tant che un frut. Ma se invezit voaltris ur disês: “Il mont di dulà che al vignive e je la piçule stele B612” Alore si cunviçaran subit e us lassaran in pâs cu lis domandis. A son fats cussì. Nol è di cjapâse. I fruts a àn di jessi indulgjents cui grancj.
Ma di sigûr, nô che o cognossìn la vite, nô no lin a fastiliâ pai numars! Mi sarès plasût scomençâ cheste conte tant che une flabe di fadis. Mi sarès plasût dî:
“Al jere une volte un piçul princip che al viveve suntun piçul planet pôc plui grant di lui e al veve bisugne di un amì…”
Par chei che a capissin la vite, al sarès stât cetant plui vêr. Parcè che no mi plâs che si lei il gno libri cun cûr lizêr. Al è un grant displasê par me confidâ chescj ricuarts. A son bielzà sîs agns che il gno amì al è lât vie cu la sô piore e jo o cîr di piturâlu par no dismenteâlu. Nol è biel dismenteâ un amì. E o pues ancje jo deventâ come i grancj che no si interessin plui di numars. E al è ancje par chest che o ai comprade une scjatule cui colôrs e cu lis matitis. Nol è facil tornâ a metisi a dissegnâ ae mê etât cuant che no si à provât altri che a piturâ un sarpint boa dal di fûr e chel di un altri sarpint dal di dentri, ae etât di sîs agns. Mi studiarai un mût di fâ tancj ritrats che si somein un grum: ma no soi dal dut sigûr di rivâ. Un dissen al va ben, ma chel altri no i somee par nuie. Mi sbalii ancje su la stature. Culì il piçul princip al è masse grant, chel altri al è masse piçul. No soi tant sigûr ancje sul colôr dal so vistît. Inalore o tenti e o ritenti insigûr, ben o mâl. E o finarai par sbaliâmi su cierts particolârs plui impuartants. Ma chest si scuen perdonâmal. Il gno amì no mi deve mai spiegazions. Forsit al crodeve che o fos come lui. Jo par sfortune, no savevi viodi lis pioris dentri lis casselis. Al pues stâi che o sêdi un pôc tant che i grancj. O devi sêi deventât vieli.