Ogni dì o imparavi cualchi alc sul planet, su la partence, sul viaç. E al vignive di bessôl cualchi pinsîr.
Al fo cussì che la tierce zornade o cognossei il probleme dai baobab.
Ancje cheste volte al fo merit de piore, parcè che di colp il pricipin mi domandà, come cjapât di un fuart dubi:
“Ise vere che lis pioris a mangjin lis menadis dai arbui piçui? Ma il piçul princip al le indevant:
“Alore mangjino ancje i baobab?”
I disei al piçul princip che i baobab no son arbuluts, ma a son arbui grancj come glesiis e che se al ves puartât cun sè une mandrie di elefants, nol sarès vignût a cjâf di un sôl baobab.
La pensade dai elefants e fasè ridi il piçul princip:
“Si scugnarès metîju un parsore l’altri…”
Ma al pensà cun sintiment:
“I baoabab prime di deventâ grancj a scugnin sei piçui.”
“ Juste! Ma parcè vuelistu che lis tôs pioris a mangjedin i baobab di piçui?
“Beh! Si capìs”, mi rispuindè come che e fos une robe tant clare. E mi coventà un grant sfuarç di inteligjence par capî di bessôl chest probleme.
Di fat sul planet dal piçul princip a son, come pardut, lis jerbis buinis e chês tristis. Par chest, lis semencis buinis di jerbis buinis e semencis tristis di jerbis tristis. Ma lis semencis a son invisbilis. A duarmin platadis sot tiere fintant che a une o a chê altre no ur vegni la fantasie di tornâsi a sveâ. Alore cheste si slungie, e e sburte in sù timidine viers il soreli une pivide cence tristerie. Se si trate di un ufiel o di un rosâr, si pues lassâlu cressi come che al vûl. Ma se si trate di une plante triste, e ûl gjavade subite a pene che si le à cognossude. A jerin des semencis teribilis tal mont dal piçul princip: a jerin lis semencis dai baobab. Il teren al jere invadût… Ore presint, un baobab, se si rive masse tart, no si rive a diliberâsi. Al inderede dut il planet. Lu travierse fûr par fûr cu li sôs lidrîs. Se il planet al è masse piçul e se i baobab a son di masse, lu fasin sclopâ.
“E je une cuistion di dissipline” mi diseve plui tart il piçul princip. “Cuant che si à finît di lavâsi a buinore, si scuen fâ cun cure la pulizie dal teren. Si scuen slidrisâ i baobab, in mût regolâr, a pene viodûts tal mieç dai rosârs che ur somein une vore cuant che a son piçui. Al è un lavôr stufadiç, ma facil”.
E une dì mi conseà di fâ un biel dissen par fâ jentrâ benon cheste pensade ai fruts dal gno paîs.
“Se une dì si metaran in viaç”, mi diseve, chest consei ur podarà coventâ. Cualchi volte al è facil rimandâ a plui tart il lôr lavôr. Ma se si trate dai baobab al è simpri un disastri. “O ai cognossût une tiere dulà che al stave un pegri. Al veve trascurât trê plantutis…”
E su consei dal princip o ai dissegnât chel planet. No mi plâs fâ il moralist. Ma la menace dai baobab e je cussì pôc cognossude e i pericui che al corarès cui che si piardès suntun asteroit cussì grâfs, che une volte tant o ai fate ecezion.
E o dîs: “Fruts! Fasêt atenzion ai baobab!”. E par visâ i miei amîs di un pericul che a àn simpri sfiliât, tant che jo stes, cence cognossilu, o ai tant lavorât a chest dissen. La lezion che o davi e rindeve juste la fadie.
Voaltris mi domandarês forsit: “Parcè no ‘nt sono in chest libri altris dissens ancjetant grandiôs tant che chel dai baobab? La rispueste e je une vore semplice: “O ai cirût di fânt un, ma no ai rivât. Cuant che o ai dissegnât i baobab o jeri sburtât di premure”.
