Jo o crôt che lui al profitàs, par scjampâ vie, di une migrazion di uciei salvadis. Inte buinore de partence al metè ben in ordin lis robis su la sô stele. Al netà ben il cjamin dai siei vulcans. Stant che al paronave su doi vulcans in ativitât. Al jere un grum comut par fâ scjaldâ la gulizion de buinore. Al veve ancje un vulcan studât. Ma, come che lui al diseve, “No si sa mai” e cussì al netà ancje chel studât. Se i cjamins a son libars, a brusin a planc, in mût regolâr, cence rutâ. Lis butadis di lave a son tant che i sclops intai cjaminets. Al è clâr che su la nestre tiere nô o sin masse piçui par podê netâ la nape dai nestris vulcans e al è par chest che nus fasin tancj dams.
Il piçul princip al gjavà malcontent ancje lis ultimis pividis dai baobab. Al crodeve di no tornâ mai plui. Ma ducj chei lavôrs no solits i someavin, in chê matinade, une vore dolçs. E cuant che al sborfà pe ultime volte il so flôr, e si preparà a metîlu a sotet sot la cjampane di veri, si visà che al veve une grande voie di vaî.
“Mandi” i disè al flôr.
Ma lui nol rispuindè.
“Mandi”, al tornà a dî.
Il flôr al dè une tossude. Ma nol jere par vie dal rafredôr.
“O soi stât un stupit”, al disè inalore, “Scusimi, e cîr di stâ content.”
Si smaraveà che no lu ves rimproverât.
Al restà confusionât, cu la cjampane di veri par aiar. Nol capive chê calme dolce.
“Ma sì, ti vuei ben”, al disè il flôr, “E tu no tu lu âs savût par colpe mê. Chest nol à impuartance, ma tu sês stât stupit come me. Cîr di sei content. Tire vie cheste cjampane di veri, no le vuei plui.”
“Ma l’aiar…”
“No ai chel frêt… L’ aiar fresculin de gnot mi fasarà ben. O soi un flôr”.
“Ma lis bestiis…”
“O varai pûr di sopuartâ cualchi ruie se o volarai cognossi lis paveis, al somee che a sedin cussì bielis. Se no cui vignaraial a cjatâmi? Tu tu sarâs lontan e des bestiis gruessis no ai pôre. O ai lis mês sgrifis”.
E al mostrave cence pôre lis sôs cuatri spinis. Po al zontà:
“No sta sei cussì indecîs, al da fastili. Âstu decidût di partî, e alore inviiti”.
Parcè che nol voleve che lu viodès a vaî. Al jere un flôr cussì orgoiôs…