Dint’ a na grotta scura
dormeno ’e zampugnare:
dormeno, appesa a ’e mura,
e ronfeno, ’e zampogne
quase abbuffate ancora
’a ll’ úrdema nuvena;
e, ghianca, accumparesce e saglie ncielo,
dint’ ’a chiara nuttata, ’a luna chiena.
Dormeno: a mezanotte
cchiù de n’ ora ce manca;
e se sparano botte,
s’appicceno bengala,
e se canta e se sona
pe tutto ’o vicenato…
Ma ’o Bammeniello nun è nato ancora,
e nun s’ è apierto ancora ’o Viscuvato.
Fora, doppo magnato,
esce nfucata ’a gente:
ccà d’ ’o viento gelato,
p’ ’e fierre d’ ’a cancella,
trase ’a furia ogne tanto…
E c’ ’o viento, e c’ ’o friddo,
ncopp’ ’a paglia pugnente, a ppare a ppare,
dormeno, stracque e strutte, ’e zampugnare…
S’ è scetata mpunt’ ’e quatto
na zampogna, e sta parlanno.
– Bene mio! – dice. – È n’ at’ anno
ca turnammo a beni’ ccà!
E turnammo, n’ ata vota,
a fa’ ’o soleto lamiento:
viene, vaie, nun truove abbiento,
sona ccà; va a sunà llà!
E che suone? Ullèro, ullèro!
È nasciuto il Re del Cielo,
che nel candido suo velo
sulla terra calerà!
Maie d’ ammore na canzona,
maie, maie n’ aria o allera o doce!
’E na femmena na voce
maie putimmo accumpagnà!
Mme credite? Sto speruta
’e sentì n’ aria curtese,
e chest’ aria d’ ’o pagghiese
cu stu suono accumpagnà! –
E rispunnette n’ ata zampogna:
– Cummà, sentite, ve voglio di’
ca senz’ offesa, si premmettete,
st’ aria curtese m’ ’allicordo i’.
È anticulella, ma nun fa niente,
ca se pò sempe bona cantà:
po’ addò sta scritto ca brutto è ’o bbiecchio?
Nun cagna ammore: nun pò cagnà.
E comm’ a chesta quant’ ate e quante
me n’ allicordo belle accussì!
Cierti canzone cu cierti stese
fatte p’ ’e core fa’ ntenerì!…
– Embè… sunatene quaccuna… – E comme?
Si nun m’ abboffeno che buo’ sunà!?
– Zi’!… St’ amicizia surtanto ’o viento,
si ’o viento è amabbele, mo ce pò fa’…
– Viento! – dicettero tutte ’e zampogne –
nficchete, mpizzete, fance abbuffà!
Fance chest’ úrdema nuttata, st’ anno,
cuntenta, a Nnapule bella, passà… –
E tècchete trasette p’ ’e cancelle
nu sbruffo ’e viento e ll’ abbuffaie, sciuscianno
dint’ ’e zampogne e mpont’ ’e ciaramelle.
E ’a grotta se scetaie: liggiero e lento
nu mutivo ’e canzone ’e primmavera
accumminciaie cu n’ accumpagnamento
a tterza sotto. ’A luna, auta ca steva
e cammenanno, se fermaie: chiù tonna
’e nu mellone e cchiù ghianca d’ ’a neva.
Guardatele, guardatele… Sentenno
sta museca sunà, doce, ’int’ ’o scuro,
se torceno ’e cchiù giuvene, durmenno.
Se voteno, se gireno, c’ ’a faccia
ncopp’ ’e mantielle, e comm’ ’int’ a nu suonno,
muoveno ’e mmane e stenneno li braccia…
Ronfeno ’e viecchie: sprufunnate stanno,
surde, stracque, ’int’ ’o suonno e dint’ ’a paglia:
e a stu suono suttile ’o basso fanno…
Zampogna sola e coro ’e zampogne.
Aiemmé! L’ ammore è comm’ a na muntagna
e ce sta, ncoppa, n’ arbero affatato:
rire chi saglie e chi scenne se lagna,
ca ’o frutto culurito è mmelenato!
Ah! Ullèro, ullèro, ullà!
È comm’ a na muntagna…
E nun canta sta voce, aiemmé, se lagna!…
Ricordete, Marì! L’ aria addurava,
ce ne ievemo sule a passe a passe;
e ce faceva luce e ce guardava
na luna che pareva ca penzasse…
Ah! Ullèro, ullèro, ullà!
Sta luna ce guardava…
Chi sa che lle pareva e a che penzava!
Tomo p’ ’a stessa via: ce passo a ll’ ora
ca ce passaie cu tte ll’ úrdema vota:
mme pare ’a voce toia sentere ancora…
Ah! comm’ avota ’o munno, ah, comm’ avota!…
E ullèro, ullèro, ullà!
Te chiammo: e ’a miez’ ’e ffronne
ll’ eco, ll’ eco surtanto mme risponne…
D’ ’e pedezzulle tuoie, nterra, ccà nnante
veco e canosco ’o segno c’ aie lassato:
vicino a lloro, uh Dio, chiaro e lampante,
’o segno ’e n’ ati dduie ce sta stampato!…
Ah! Ullèro, ullèro, ullà!
Povero a me! So’ stato
pe n’ at’ ommo traduto e abbandunato!…
Tutto è fenuto! C’ ’a staggiona nova
làsseno ’a casa vecchia ll’ aucielle,
correno a n’ ata parte a fa’ la cova,
e tu pure, tu pure ’e mise ’e scelle!…
E ullèro, ullèro, ullà!…
L’ammore è na muntagna
rire chi saglie e chi scenne se lagna…
E fenette ’a canzona…
(E pareva c’ ’o cielo, for’ ’a grotta,
se fosse fatto p’ ’a piatà cchiù niro,
dint’ ’a pace d’ ’a notta.)
E fenette accussì, cu nu suspiro…
– E ghiate, ia’!… – dicette
’a cchiù longa e cchiù allera ciaramella. –
E chesta è stata ’a canzona curtese?!
Ne saccio una cchiù bella…
Iammo! ’O viento ce sta. Se canta a stesa…
Cu sta malincunia
v’ ammusciate cchiù assaie, cummara mia! –
Ciaramella sola.
– Oi ma’, – dicette a màmmema na vota –
io mme vurria nzurà: che nne dicite?
vurria truvà na femmena e na dota:
cunzigliateme vuie ca vecchia site. –
Màmmema ’a capa aizaie: mpont’ a nu dito
teneva ’o ditaliello spertusato,
me metteva na pezza a nu vestito,
e ’int’ ’a pezza lassaie ll’ aco appezzato…
E dicette accussì:
Nda mbò! Ndì ndì!
«Oro t’ ha dda purtà, seta e velluto,
e pperne ’e qualità, sfuse e nfelate,
nu cummò ’e palisante auto e ghienguto
’e panne lisce e panne arricamate.
Si è d’ ’o pagghiese ’a massaria nzerrata
addò nisciuno maie nun c’ è trasuto:
si è de cità na bona annummenata,
n’ arte ’e mmane e nu patre canusciuto…
Canusciuto, guaglió!
Nda mbò! Nda mbò!»
– E quann’ è chesto, oi ma’, – lle rispunnette –
sta nenna tale e quale rifurmata
comm’ ’a vulite vuie, senza difette
e cu tanta virtù, l’aggio truvata.
Rosa se chiamma. ’E pperne? ’E ttene mmocca.
Ll’ oro? Songo ’e capille anella anella.
’O musso è comm’ a ddoie cerase a schiocca.
’E velluto so’ ll’ uocchie… È bella! È bella!
È bella, è bella, oi ma’!
Nda mbò! Nndì ndà!…
E pe riguardo ’a massaria… –
Fenette
tutta na vota ’a museca. Sfiatate
zampogne e ciaramelle
fenettero ’e sunà. Pe nu mumento,
dint’ ’o silenzio, ’a grotta
rummanette accussì:
po’ luntano sparaie n’ úrdema botta,
e nu gallo cantaie: «Chicherichì!»
«Chicherichì!…» tante e tant’ ata galle
rispunnettero a ttuono.
L’ organo d’ ’a parrocchia ’e ffunzione
nfra tanto accumpagnava
spannenno ’o suono attuorno,
e già p’ ’a strata ’a gente cammenava.
Era Natale. E s’ era fatto iuorno.
– Scetateve, scetateve, picciuotte!
Mannaie! Parte ’o papore!
Susiteve ch’ è tarde: è fatto iuorno
e vuie durmite ancora!
Pigliateve ’e zampogne,
ncapputtateve buone ascenno fora,
ca fa nu friddo ca fa zumpà ll’ ogne! –
E, a ppoco a ppoco, ’a grotta vummecaie
(parlanno cu rispetto)
quase na sittantina ’e zampugnare.
Stunate ’e cchiù figliule
steveno tutte quante…
Camminaveno arreto sule sule:
ieveno ’e viecchie, accapputtate, nnante.
Mo s’ ’e pporta ’o cummoglio: e sesca, e corre:
e case, arbere e sciumme
fuieno comm’ ’o viento…
Nun parla cchiù nnisciuno
mmiez’ ’a fredda campagna;
ma pur ancora suspira quaccuno:
«Ammore, ca si’ comm’ a na muntagna…»