Facettemo stu patto: – Ogge nn’ avimmo trenta:
stammo a nuvembre, è overo? Be’… n’ati trenta
[iuorne.
– E po’?… – Po ce lassamma Va bene?… Si’ cuntenta? –
Penzaie nu poco, e doppo dice: – E va bene… Sì. –
Nu sì senza na lacrema, senza nu pentimento,
anze (ma che so’ ’e femmene!) cu na resella amara…
Io mme senteva sbollere!… Dice: – E… tu si’ cuntento?
– Sì! – rispunnette io subbeto. – Ma si t’ ’o prupongo
[i’! –
E ce turnaimo, zitte… Ah, chella fredda mano
ca quase ancora strenta teneva dint’ ’a mia,
ah, chella mano, comme se ne sfuiette chiano,
cu tutto c’ ’a sentette quase ’int’ ’a mia tremmà!…
Scennettemo a Tuleto. Llà ’e lume, ’e vvoce, ’a gente,
comme si ce vulessero di’: «Ma ched’ è? Ch’ è
[stato?…»
ce sullevaino. Emilia, llà, mme tenette mente
doie vote, mmiez’ ’a folla, ma senza maie parlà.
Io stevo pe lle dicere tutte ’e ddoie vote: «Siente…
Perdoneme!… Perdoneme!…» Ma po’, nun saccio
[comme,
restaie cchiù cupo e zitto: mme se nzerraino ’e diente,
e mme nchiudette io pure… Povero ammore!
[Aiemmé!…
«Dicembre: vintiquatto… Quant’ ate iuorne? Sette…»
penzavo a ’o pizzo soleto, tre settimane appriesso:
e a nu rilorgio ’e chiesia, lenta, sunà sentette
chell’ ora nosta soleta, luntana… Una… doie… tre…
Una… doie… tre… Cadevano ll’ ore ’int’ ’a notta scura
quanno, cchiù ghianca ’e n’ostia, mm’accumparette
[nnanze…
Mme s’ afferraie, guardanneme cu ll’uocchie d’ ’a
[paura,
e, strinte, ce mettettemo ’a via sulagna a fa’.
Strinte, abbracciate, quase… Doie lacreme vedette
tutto na vota scorrere dint’ a chili’ uocchie spierze…
– Dicembre… vintiquatto… Quant’ ate iuorne?…
[Sette… –
E chesto, ’int’ ’o silenzio, chesto ’a sentette di’…
Saglieva ’a dinto Napule, nzieme cu tanta voce,
confusa ’int’ a na nebbia na luce ’e tanta lume:
sentevemo ’e zampogne, c’ ’o suono antico e ddoce,
ienghere ll’ aria, e tutte sti vvoce accumpagnà…
Ah, comme ce strignettemo cchiù forte!… «È overo, è
[overo,
st’ ammore è nu pericolo pe tutt’ ’e dduie!… Ce
[simmo
abbandunate a ll’ ombra! Sperdute ’int’ ’o mistero!…
Sì, cammenammo ’ascuro!… Sì, ’o ssaccio… Ma che
[fa?…»
Mm’ ’a strascenavo appriesso… Currevemo,
[abbracciate,
quase comme si spartere quaccuno ce vulesse…
Cu ll’ uoochie chine ’e lacreme, cu ’e mmane ncatenate,
currevemo, currevemo dint’ a Il’ oscurità…
Ce stammo ancora. ’A n’ anno. E ’a morte sulamente,
’a morte ca chiammammo tutt’ ’e dduie tanta vote,
spezzà pò sta catena ca dura eternamente,
ca pesa e ca è liggiera, ca nun se vo’ spezzà…