Guarda, guarda… Nunziatella,
si nu’ sbaglio, è chesta ccà!
Porta ’a soleta vunnella
lana e seta a petipuà…
Cu stu scialle ncopp’ ’e spalle,
cu sta rosa ’int’ ’e capille,
nn’ ha fatte arze, a mille a mille,
viecchie e giuvene restà!
E mmo passa e mme saluta…
Move ’a capa… mme fa segno…
– Nunziatè!… – (Se n’ è già iuta,
mmentre stevo p’ ’a chiammà…)
’A i’ ccà n’ ata! È n’ ata cosa,
n’ ato tipo, n’ ata voce…
– Mme canusce? I’ songo Rosa…
Te ricuorde, o manco cchiù? -
Rosa! Rosa! Anema fina!
Faccia ’e cera, uocchie lucente!
E accussì barbaramente
t’ aggio avuta abbandunà!
– Siente… – Addio… – Ma mme perduone?
Siente… E siente… – (Essa, ’a luntano,
mme saluta e stenne ’a mano,
vota ’e spalle e se ne va…)
E chest’ ata? Chi è chest’ ata?
(Vuo’ vedé ca è Teresina
ca s’ è pure mmaretata?)
– Bravo! Prósitte, Teré!
E… ’o guaglione? – È muorto. – È muorto?!…
Comme!… È muorto?… – Aiere… Addio…
Figlio! – chiagne – ah, figlio mio!… -
E po’ ’a veco scumparì…
Dormo o veglio?… È suonno, o pure
fosse ’a freva ca mm’ abbruscia?
St’ ombre chiare e st’ ombre scure
songo spirete, o che so’?…
Vurria moverme e nun pozzo…
Scotto nfronte… Mm’ arde mpietto:
e, assettato mmiez’ ’o lietto,
sento ’e ddoie, lente, sunà…
’E bbi’ ccà ll’ ate ombre!… Adela…
Margarita… Carulina…
Giulia… Brìggeta… Rafela…
Tutte quante attuorno a me!
E chi si’ tu, ca sta faccia
t’ annascunne ’int’ a stu velo?
Ca t’ accuoste e arape ’e braccia
facenno atto ’e mm’ abbraccià?
Nun te saccio!… – Te saccio io!
Fatte ccà!… Strigneme forte!…
Nnammurato bello mio !…
Viene!… Viene!… Io songo ’a Morte!…