Che fa – quann’ overo ’a vuo’ bene –
si chella ca tu t’ ’e truvata
nun è na pupata
e li’ uocchie celeste nun tene?
Che fa?
Si ’a vuo’ bene?
Sarrà dispettosa o crudela,
gelosa,
scuntrosa…
Sarrà chi sa che, pe chi ’a guarda…
Ma che te riguarda,
si è tutto pe te?
Che fa, si stu core ca tiene
ncatena cu ciento catene?
Si ’o piglia, si ’o lassa,
si ’o vota e ’o revota e ’o ntrattene?
Che fa?
Si ’a vuo’ bene?
E mo, tuttucciò che bbulite
dicite!…
Dicite
ca è brutta – ca ’o core nn’ ’o tene…
E ’i ’a voglio cchiù bene!
Cchiù bene accussì!