Nu zampugnaro ’e nu paese ’e fora
lassaie quase nfiglianza la mugliera,
se partette pe Napule ’e bon’ora,
sunanno, allero allero: Ullèro ullèro…
E ullèro, ullèro…
(ma nun era overo,
’o zampugnaro
penzava ’a mugliera
e suspirava,
e ’a zampogna ’e suspire s’abbuffava).
Cuccato ncopp’ a paglia’o Bammeniello,
senza manco ’a miseria ’e na cuperta,
durmeva mmiez’ ’a vacca e ’o ciucciariello,
cu ll’ uocchie nchiuse e c’ ’a vucchella aperta.
E ullèro, ullèro…
che bella faccella,
che bella resella
faceva Giesù,
quanno ’a Madonna
cantava: «Core mio, fa nonna nonna!»
Mmerz’ ’e vintuno o vintiduie d’ ’o mese
na lettera le dettero ’a lucanna;
sta lettera veneva d’ ’o pagghiese,
e sotto era firmata: Marianna.
«E ullèro, ullèro,
sto bene in salute
e così spero
sentire di te:
sono sgravata,
e duie figlie aggio fatto una figliata.»
Tu scendi dalle stelle, o re del cielo,
e nuie pigliammo ’e guaie cchiù alleramente,
tasse, case cadute e freddo gelo,
figlie a zeffunno, e pure nun fa niente…
Ullèro, ullèro!
Sunate e cantate!
Sparate! sparate!
Ch’ è nato Giesù!
Giesù Bambino…
E ’a Vergine Maria s’ ’o tene nzino!…