Scennenno p’ Antignano a primma sera,
ievo cantanno n’ aria p’ ’a via:
mme suspirava attuorno ’a primmavera,
e mme faceva ’a luna cumpagnia…
St’ aria nuvella
diceva ogni mumento:
«Quanto si’ bella!
Ma quanto sto scuntento!
Tieneme mente:
nun te n’ adduone, oi ne’?…
Io mme cunzumo, io moro,
io spanteco pe tte!…»
E cantanno accussì sta campagnola
tècchete e te ncuntraie mmiez’ a tant’ ate:
e tu ’e lassaste e rummaniste sola,
e mme deciste: – Oi ni’, pe chi cantate
st’ aria nuvella
ca dice ogni mumento:
«Quanto si’ bella!
E quanto sto scuntento!»? –
E io rispunnette:
– Nun te n’ adduone, oi ne’,
ca me cunzumo e moro
e spanteco… pe tte?… –
Murmuliaste: – Overo?… – E, chiano chiano,
tu t’ accustaste… e io pure m’ accustaie…
Tu mme guardave: io te strignette ’a mano
e dint’ ’o chiaro ’e luna te vasaie…
P’ ’a notte doce
cu ccore e passione
nziemme, a doie voce,
cantàimo sta canzone:
«Tieneme mente,
tu ’o ssaie, tu ’o puo’ vedé
ca io me cunzumo, io moro,
io spanteco… pe tte…!»