Si ’e maggio adduruso
murenno sta ’o mese,
pecché cchiù scurtese
te faie, neh Rusì?
Si sparpeta ’a gente,
si rideno ’e ccose,
si ’addore d’ ’e rrose
ce fa scevulì,
pecché tu surtanto
te miette ’a spartata,
cchiù amara, cchiù ngrata
facennote mo?
E tu si’ de carne?!…
Chi sa a che penzanno
tu faie tutto ll’ anno
schiattuso passà.
C’ ’o vierno si ffredda,
nun parle, nun ride:
ma mo? Mo nun vide
ca vene ll’ està?
Stu cielo celeste,
stu sciato d’ ’o viento,
sta luna d’ argiento
te parleno o no?
Si a primma matina
t’ affacce ’a fenesta,
nun siente ogni testa
cchiù forte addurà?
Si suonno nun piglie,
si smanie ’int’ ’o lietto,
si sbattere mpietto
na nziria te fa,
ricordete, Rosa,
ca tu pure ’o ttiene
stu sango ’int’ ’e vvene
ca tengo pur’ i’!
C’ ammore cchiù forte
mo stregne ’a catena,
ca è ll’ aria c’ ’o mena,
ca è ’o tiempo c’ ’o vo’!…