HE KUPU HEI WHAI ATU

Nō ngā kōrero tuku iho a ngā iwi o Hauraki me Tāmaki-makau-rau te tāhū o tēnei pūrākau, ngā ingoa wāhi anō hoki. Ko ngā kiripuaki he mea pohewatia kētia. Ka whakanuia a Ureia i ngā kōrero mō Tainui waka me te awa o Waihou. Ka noho hoki te taniwha rā hei kaitiaki o ngā uri o Marutūāhu i rarau ai ki Te Tīkapa Moana o Hauraki i te tīmatanga o te rautau 1600. He tohu tonu a Ureia o te mana, o te mauri o Hauraki. I ētahi wā he ika, i ētahi wā he tohorā, ko ia te tino o ngā taniwha o Hauraki i manaaki, i whakatūpato ai i te iwi. Kei roto i te wharenui a Hotunui ki Tāmaki Paenga Hira, ka kitea tētahi poupou whakairo o Ureia.

Nō mua noa atu, ko Ngā Oho tētahi o ngā ingoa ā-iwi i whakakotahi ai i ngā hapū e noho ana ki Tāmaki-makau-rau. I te matenga o te arikinui a Hua Kaiwaka, ka tapaina tēnei whakaminenga ko Te Waiohua. I ētahi whakatupuranga i muri i te patunga o Ureia, i mate kōhuru te rangatira a Kahurautao nō Ngāti Maru i te Waiohua. Nā konā, ka whakaeke a Marutūāhu i ngā pā tūwatawata o Tāmaki, inā koa te pā o Maungawhau.