Pseaulme Cent dixiesme
Dixit Dominus Domino meo
Argument : Il chante le regne de Christ lequel commença en
Sion et de là pervint jusques aux fins de la terre et continuera
jusques à ce que Christ soit adoré universellement et que de ses
ennemys il ayt fait son marchepied.
L'Omnipotent à mon Seigneur, et maistre
A dit ce mot : A ma dextre te sieds,
Tant que j'auray renversé, et faict estre
Tes ennemys le scabeau de tes pieds.
Le sceptre fort de ton puissant Empire
En fin sera loing de Syon transmys
Par l'Eternel, lequel te viendra dire :
Regne au milieu de touts tes ennemys.
De son bon gré ta gent bien disposée,
Au jour tressainct de ton sacre courra :
Et aussi dru qu'au matin chet rosée,
Naistre en tes filz ta jeunesse on verra.
Car l'Eternel, sans muer de courage,
A de toy seul dit, et juré avec :
Grand Prebstre, et Roy, tu seras en tout eagé,
Ensuyvant l'ordre au bon Melchisedec.
A ton bras droict Dieu ton Seigneur, et Pere,
T'assistera aux belliqueux arroys,
Là, où pour toy, au jour de sa colere,
Rompra la teste à Princes, et à Roys.
Sur les Gentilz exercera justice,
Remplira tout de corps morts envahis,
Et frappera, pour le dernier supplice,
Le chef regnant sur beaulcoup de pays.
Puis, en passant au milieu de la plaine,
Des grands ruisseaux de sang s'abbruvera.
Par ce moyen, ayant victoire pleine,
La teste hault, tout joyeulx, levera.
