Dialogue Chrestien
CHRIST est il mort ? Ouy certainement.
Qui l'a tué ? Parfaicte charité.
L'occasion ? Pour aymer ardamment.
Quoy ? Nous, pecheurs, qui l'avons irrité.
De quoy sert il ? Il nous a merité
Son paradis, que sans luy nullement
Nous eussions eu : mais par austerité,
Jeusner, veiller, honte, croix et tourment,
Le povre Adam damné tres justement
Il a saulvé, et sa posterité,
Luy acquerant le haultain firmament,
Dont par peché estoit desherité.
Et qui croira en ceste verité
Par foy passant sens et entendement,
Aymant d'un cueur remply de purité,
En grand'clarté congnoistra vivement
Que par Dieu seul il a son saulvement,
Sans que jamais en rien l'ait merité.
