Icelluy prince des poetes declaire de qui Cupido est
heritier
Loyaulx amans, qui les durs coups sentez,
Dont le meurtrier Amour voz cueurs embroche,
Il ne fault point que vous espoventez,
Si de son arc fers en fust morne entez,
Tous emflambez, en riant il descoche :
Car il est né d'une mere, et nourry,
Dont Mars jouyt, et qui a pour mary
Le forgeron qui des deux hanches cloche.
Si donc l'enfant se delecte et solasse
En fer et feu comme en jardin fleury :
C'est ce qu'il ayme, et si le tient de race.
Sa mere apres en tous ses parentez,
Mere autre n'a, tant soit charnelle ou proche,
Que Mer gettant criz par raige augmentez,
Et augmentant flotz de ventz tourmentez,
Dont elle bat tousjours rivaige ou roche.
Or n'a la Mer, où maint homme est pery,
Pere, ny mere, ou parent tant chery,
Qu'elle cognoisse, ou estime une loche :
Par quoy troubler de legier sens et face,
Se courroucer, et faire autruy marry,
C'est ce qu'il ayme, et si le tient de race.
Pour alleger les tormentz intentez
Par ardant feu, courroux, et fer recroche :
Pleurez, mercy demandez, lamentez
Plaintivement : car tous maulx esventez
Moindres se font par pleur, plaincte, ou reproche.
Soit donc l'oeil à plorer non tary.
Car pleur feu tue, et rompt cueur d'Esmery.
Crier mercy de pitié, yre approche,
Plaindre, à douleur allegement pourchasse :
User en fault, qui veult estre guery :
C'est ce qu'il ayme, et si le tient de race.
Amour le feu a de Vulcan noircy,
De la Mer creuse yre et courroux transsy :
Et dardz sanglans de Mars portant cuyrasse.
Veoir pleurs, ouyr plaindre, et crier mercy,
C'est ce qu'il ayme, et si le tient de race.
