Rondeaux de L'Adolescence clementine du 12 decembre
I534
I
Au cueur ne peult ung chascun commander,
Ne les raisons de son vueil demander
Pour les entendre à sa perfection :
Cela, pour vray, gist à l'affection,
Qui sert de luy pour nuyre ou amender.
L'oeil fourvoyé se peult contremander,
Bouche obeyr pour se recommander,
Bien que ce soit dissimulation
Au cueur.
La main se peult à tous faictz hazarder,
L'oreille ouyr, ou d'ouyr se garder :
Franche est ainsi leur occupation.
Au dedans gist toute l'affection,
Mesme d'amour, où il fault regarder
Au cueur.
II
Juges, prevostz, bourgeoys, marchans, commun,
Nobles, vilains, et vous seigneurs d'Eglise,
Amendez vous : sinon je vous advise
Que ne verrez l'an cinq cens quarante un.
Lassus aux cieulx il est bruyt que chascun
Offense Dieu, qui n'est pas bonne guise,
Juges, prevostz.
Perseverer en son mal, c'est esgrun :
Le monde faict de peché marchandise.
Bref, il fauldra que chascun se reduise
Ou des trois partz n'en demourra nesun,
Juges, prevostz.
III
Qui ses besoignes veult bien faire
Selon le temps qui present court,
Dissimuler fault, et soy taire.
Peu parler, et faire le sourd
Est bon : car grand prouffit en sourt
[Qui ses besoignes veult bien faire.]
Le Herault ung peu contrefaire,
Mais encore est il necessaire
Estre beau parleur, et non lourd,
[Qui ses besoignes veult bien faire.]
IV
O quel erreur, par finis esperitz
Vouloir finir l'infiny, sans nul pris,
Par raison morte et mondaine apparence
Voulant comprendre en debile science
Une bonté, qui tous nous a compris.
Créé nous a en ce mondain pourpris,
Et rachepté quand nous eusmes mespris :
Et nous doubtons quelle est sa puissance :
O quel erreur.
Par Testament sa Loy nous a appris
Amour donné pour acquerir le pris.
D'heureux labeur, par foy et esperance.
Allons à luy, en nous n'ayons fiance :
Qui ne le faict en enfer est repris :
O quel erreur.
V
O Bon Jesus de Dieu eternel filz,
Qui avec luy les cieulz et monde fis,
Las prens pitié de moy, ta creature :
J'ay contre toy tant faict de forfaicture
Que tous mes sens en sont de dueil confictz.
En une croix tout ton corps fut affix,
Où par ta mort les enfers tu deffictz,
Non pour moy seul, mais pour toute nature
O Bon Jesus.
En ceste croix où tu fuz crucifix,
De paradis le chemin tu reffis,
Et d'icelluy feis à tous ouverture.
De tous delictz tu est la couverture :
Couvre les miens, et ce qu'oncques meffeis,
O Bon Jesus.
VI
Rondeau de l'honneur des Dames
Devant vos yeulx, Dames, ayez honneur,
Et si voulez parvenir à bon heur,
Ne faictes rien que ne voulez qu'on saiche :
Car il n'est feu, quelque par qu'on le caiche,
Dont il ne sorte ou fumée, ou chaleur.
Craignez un dieu, honorez un seigneur,
Faictes la sourde à tout grand blasonneur,
Et ne souffrez jamais faire ung tour lasche
Devant voz yeulx.
Donner vous fault, mais fuyez le donneur,
Car le donnant oblige le preneur,
Et gardez bien que la villaine tache
D'ingratitude en voz cueurs ne s'atache :
Car il n'en peult venir que deshonneur
Devant voz yeulx.
