Voy che ascoltate in ryme sparse il suono
Vous qui oyez en mes rymes le son
D'iceulx souspirs, dont mon cueur nourrissoie
Lors qu'en erreur ma jeunesse passoie,
N'estant pas moy, mais bien d'autre façon :
De vains travaulx dont feis ryme et chanson,
Trouver m'attens (mais qu'on les lise et voye)
Non pitié seulle, ains excuse en la voye
Où l'on congnoist amour, ce faulx garson.
Si voy je bien maintenant et entendz
Que longtemps fus au peuple passetemps,
Dont à par moy honte le cueur me ronge :
Ainsi le fruict de mon vain exercice
C'est repentance, avec honte et notice
Que ce qui plaist au monde n'est que songe.
