PERFUSA quanto sanguine Hyems tepet
Britannico de fonte! Vrilium
Semper fuisti victimarum
Prodiga, Taurica Chersonese!
Quis vulneratum deferet auribus
Nuper relictæ celsum animi virum?
Pallebit ut conjux sub Hæmo
Vipereo moritura morsu.
Spes insusurret credula credulæ
Jam jam reversurum edomito Scythâ,
Jam jamque sanandum; salutem
Contulerit popularis aura.
Equus sed idem non revehet domum,
Discerptus ille est sulphureo globo,
Restabat ante atque inter hostes
Solus eques, médius suorum.
Plerosque mortis perpetuus sopor
Pressit: quibusdem cara parentium,
Quibusdam et ipsis cariora,
Nomina contremuere labro.
Sublimiore, O Anglia, anhelitu
Nunquam attigisti culmina gloriæ,
Nec fortiores militarunt
Sub ducibus magis imperitis.