Sis læta natis, læta nepotibus,
O Nora! fractis filia voculis
Deos biennis comprecata
Te pietate pari osculetur!
Futura sunt hæc, nec simul omnia.
Labuntur amnes sub placido Jove
Cursu quieto, pleniores
Floriferis nocuere pratis.
Immitibus quà lassa caloribus
Tellus fatiscit non venit Hesperus,
Sed rura pontumque infrementem
Nox operit subi tis tenebris.
Profusa nunquam, nunquam inhibens manum,
Fortuna vobis munera conférât.
Rores minutatim cadentes
Lætificant sata, lædit imber.
Nos vota ad aram qua steteras heri
Velata virgo (sint rata!) vovimus,
Ut dextra quæ te duxit illuc
Ne doleat digito annulari.
Vir, quum senectus attenuet manum
Tam mollicellam, vix gracilem putet,
Ori-que subridens venusto
Innocuis benedicat annis!