ṛṣir uvāca
śakrādayaḥ suragaṇā nihate ’tivīrye
tasmin durātmani surāribale ca devyā
tāṁ tuṣṭuvuḥ praṇatinamraśirodharāṁsā
vāgbhiḥ praharṣapulakodgamacārudehāḥ
devyā yayā tatam idaṁ jagad ātmaśaktyā
niḥśeṣadevagaṇaśaktisamūhamūrtyā
tāṁ ambikām akhiladevamaharṣipūjyāṁ
bhaktyā natāḥ sma vidadhātu śubhāni sā naḥ
yasyāḥ prabhāvam atulaṁ bhagavān ananto
brahmā haraś ca na hi vaktum alaṁ balaṁ ca
sā caṇḍikākhilajagat paripālanāya
nāśāya cāśubhabhayasya matiṁ karotu
yā śrīḥ svayaṁ sukṛtināṁ bhavaneṣvalakṣmīḥ
pāpātmanāṁ kṛtadhiyāṁ hṛdayeṣu buddhiḥ
śraddhā satāṁ kulajanaprabhavasya lajjā
tāṁ tvāṁ natāḥ sma paripālaya devi viśvam
kiṁ varṇayāma tava rūpam acintyam etat
kiñ cātivīryam asurakṣayakāri bhūri
kiṁ cāhaveṣu caritāni tavāti yāni
sarveṣu devy asuradevagaṇādikeṣu
hetuḥ samastajagatāṁ triguṇāpi doṣair
na jñāyase hariharādibhir apyapārā
sarvāśrayākhilam idam jagad amśabhūtam
avyākṛtā hi paramā prakṛtis tvam ādyā
yasyāḥ samastasuratā samudīraṇena
tṛptiṁ prayāti sakaleṣu makheṣu devi
svāhāsi vai pitṛgaṇasya ca tṛptihetur
uccāryase tvam ata eva janaiḥ svadhā ca
yā muktihetur avicintyamahāvratā tvaṁ
abhyasyase suniyatendriyatattvasāraiḥ
mokṣārthibhir munibhir astasamastadoṣair
vidyāsi sā bhagavatī paramā hi devi
śabdātmikā suvimalargyajuṣām nidhānam
udgītharamyapadapāṭhavatāṁ ca sāmnām
devī trayī bhagavatī bhavabhāvanāya
vārtā ca sarvajagatāṁ paramārtihantrī
medhāsi devi viditākhilaśāstrasārā
durgāsi durgabhavasāgaranaur asaṅgā
śrīḥ kaiṭabhārihṛdayaikakṛtādhivāsā
gaurī tvaṁ eva śaśimaulikṛtapratiṣṭhā
īṣatsahāsam amalaṁ paripūrṇacandra-
bimbānukāri kanakottamakāntikāntam
atyadbhutaṁ prahṛtam āttaruṣā tathāpi
vaktraṁ vilokya sahasā mahiṣāsureṇa
dṛṣṭvā tu devi kupitaṁ bhrukuṭīkarālam
udyacchaśāṅkasadṛśacchavi yan na sadyaḥ
prāṇān mumoca mahiṣas tad atīva citraṁ
kair jīvyate hi kupitāntakadarśanena
devi prasīda paramā bhavatī bhavāya
sadyo vināśayasi kopavatī kulāni
vijñātam etad adhunaiva yad astam etan
nītaṁ balaṁ suvipulaṁ mahiṣāsurasya
te sammatā janapadeṣu dhanāni teṣāṁ
teṣāṁ yaśāṁsi na ca sīdati dharmavargaḥ
dhanyāsta eva nibhṛtatmajabhṛtyadārā
yeṣāṁ sadābhyudayadā bhavatī prasannā
dharmyāṇi devi sakalāni sadaiva karmāṇy
atyādṛtaḥ pratidinaṁ sukṛtī karoti
svargaṁ prayāti ca tato bhavatlī prasādāl-
lokatraye ’pi phaladā nanu devi tena
durge smṛtā harasi bhītim aśeṣajantoḥ
svasthaiḥ smṛtā matim atīva śubhāṁ dadāsi
dāridryaduḥkhabhayahāriṇi kā tvad anyā
sarvopakārakaraṇāya sadārdracittā
ebhir hatair jagad upaiti sukhaṁ tathaite
kurvantu nāma narakāya cirāya pāpam
samgrāma mṛtyum adhigamya divaṁ prayāntu
matveti nūnam ahitān vinihaṁsi devi
dṛṣṭvaiva kiṁ na bhavatī prakaroti bhasma
sarvāsurān ariṣu yat prahiṇoṣi śastram
lokān prayāntu ripavo ’pi hi śastrapūtā
itthaṁ matir bhavati teṣv api te ’tisādhvī
khaḍgaprabhānikaravisphuraṇais tathograiḥ
śūlāgrakāntinivahena dṛśo ’surāṇām
yan nāgatā vilayam aṁśumad indukhaṇḍa-
yogyānanam tava vilokayatāṁ tad etat
durvṛttavṛttaśamanaṁ tava devi śīlaṁ
rūpaṁ tathaitad avicintyam atulyam anyaiḥ
vīryaṁ ca hantṛ hṛtadevaparākramāṇāṁ
vairiṣv api prakṭitaiva dayā tvayettham
kenopamā bhavatu te ’sya parākramasya
rūpaṁ ca śatrubhayakāry atihāri kutra
citte kṛpā samaraniṣṭhuratā ca dṛṣṭā
tvayy eva devi varade bhuvanatraye ’pi
trailokyam etad akhilaṁ ripunāśanena
trātam tvayā samaramūrdhani te ’pi hatvā
nītā divaṁ ripugaṇā bhayam apy apāstam
asmākam unmada surāribhavam namaste
śūlena pāhi no devi pāhi khaḍgena cāmbike
ghaṇṭāsvanena naḥ pāhi cāpajyānissvanena ca
prācyāṁ rakṣa pratīcyāṁ ca caṇḍike rakṣa dakṣine
bhrāmaṇenātmaśūlasya uttarasyāṁ tatheśvari
saumyāni yāni rūpāṇi trailokye vicaranti te
yāni cātyantaghorāṇi tai rakṣāsmāṁs tathā bhuvam
khaḍgaśūlagadādīni yāni cāstrāṇi te ’mbike
karapallavasaṅgīni tair asmān rakṣa sarvataḥ
ṛṣir uvāca
evaṁ stutā surair divyaiḥ kusumair nandanodbhavaiḥ
arcitā jagatām dhātrī tathā gandhānulepanaiḥ
bhaktyā samastais tridaśair divyair dhūpaiḥ sudhūpitā
prāha prasādasumukhī samastān praṇatān surān
devy uvāca
vriyatām tridaśāḥ sarve yad asmatto ’bhivāñchitam
dadāmy aham atiprītyā stavair ebhiḥ supūjitā
devā ūcuḥ
bhagavatyā kṛtaṁ sarvaṁ na kiñcid avasiṣyate
yad ayaṁ nihataḥ śatrur asmākam mahiṣāsuraḥ
yadi cāpi varo deyas tvayā ’smākaṁ maheśvari
saṁsmṛtā saṁsmṛtā tvaṁ no himsethāḥ paramāpadaḥ
yaś ca martyaḥ stavair ebhis tvāṁ stoṣyaty amalānane
tasya vittarddhivibhavair dhanadārādisampadām
vṛddhaye ’smat prasannā tvam bhavethāḥ sarvadāmbike
iti prasāditā de vair jagato ’rthe tathātmanaḥ
tathety uktvā bhadrakālī babhuvāntarhitā nṛpa
ity etat kathitaṁ bhūpa sambhūtā sā yathā purā
devī devaśarīrebhyo jagattrayahitaiṣinī
punaś ca gaurīdehāt sā samudbhūtā yathābhavat
vadhāya duṣṭadaityānām tathā śumbhaniśumbhayoḥ
rakṣanāya ca lokānāṁ devānām upakāriṇī
tac chṛṇuṣva mayākhyātaṁ yathāvat kathayāmi te
