ṛṣir uvāca

ājñaptāste tato daityāś caṇḍamuṇḍapurogamāḥ

caturaṅgabalopetā yayur abhyudyatāyudhāḥ

dadṛśus te tato devīm īṣaddhāsāṁ vyavasthitām

simhasyopari śailendraśṛṅge mahati kāñcane

te dṛṣtvā tāṁ samādātum udyam añcakrur udyatāḥ

ākṛṣṭacāpāsidharās tathānye tat samīpagāḥ

tataḥ kopaṁ cakāroccair ambikā tān arīm prati

kopena cāsyā vadanaṁ maṣīvarṇam abhūt tadā

bhrukuṭīkuṭilāt tasyā lalāṭaphalakād drutam

kālī karālavadanā viniṣkrāntāsipāśinī

vicitrakhaṭvāṅgadharā naramālāvibhūṣaṇā

dvīpicarmaparīdhānā śuṣkaṁāmsātibhairavā

ativistāravadanā jihvālalanabhīṣaṇā

nimagnāraktanayanā nādāpūritadiṅmukhā

sā vegenābhipatitā ghātayantī mahāsurān

sainye tatra surāriṇām abhakṣayata tad balam

pārṣṇigrāhāṅkuśagrāhiyodhaghaṇṭāsamanvitān

samādāyaikahastena mukhe cikṣepa vāraṇān

tathaiva yodhaṁ turagai rathaṁ sārathinā saha

nikṣipya vaktre daśanaiś carvayaty atibhairavam

ekaṁ jagrāha keśeṣu grivāyām atha cāparam

pādenākramya caivānyam urasānyam apothayat

tair muktāni ca śastrāṇi mahātrāṇi tathāsuraiḥ

mukhena jagrāha ruṣā daśanair mathitāny api

balināṁ tad balaṁ sarvam asurāṇāṁ durātmanām

mamardābhakṣayac cānyān anyāṁś cātāḍayat tathā

asinā nihatāḥ kecit kecit khaṭvāṅgatāḍitāḥ

jagmur vināśam asurā dantāgrābhihatās tathā

kṣaṇena tad balaṁ sarvam asurāṇāṁ nipātitam

dṛṣṭvā caṇḍo ’bhidudrāva tāṁ kālīm atibhīṣaṇām

śaravarṣair mahābhīmair bhīmākṣīm tāṁ mahāsuraḥ

chādayāmāsa cakraiś ca muṇḍaḥ kṣiptaiḥ sahasraśaḥ

tāni cakrāṇy anekāni viśamānāni tan mukham

babhur yathā ’rkabimbāni subahūni ghanodaram

tato jahāsātiruṣā bhīmaṁ bhairavanādinī

kālī karālavaktrāntar durdarśadaśanojjvalā

utthāya ca mahāsimhaṁ devī caṇḍam adhāvata

gṛhītvā cāsya keśeṣu śiras tenāsinācchinat

atha muṇḍo ’bhyadhāvat tāṁ dṛṣṭvā caṇḍam nipātitam

tam apyapātayad bhūmau sā khaḍgābhihataṁ ruṣā

hataśeṣam tataḥ sainyaṁ dṛṣṭvā caṇḍaṁ nipātitam

muṇḍaṁ ca sumahāvīryaṁ diśo bheje bhayāturam

śiraś caṇḍasya kālī ca gṛhītvā muṇḍam eva ca

prāha pracaṇdāṭṭahasamiśram abhyetya caṇḍikām

mayā tavātropahṛtau caṇḍamuṇḍau mahāpaśū

yuddhayajñe svayaṁ śumbhaṁ niśumbhaṁ ca haniṣyasi

ṛṣir uvāca

tāv ānītau tato dṛṣṭvā caṇḍamuṇḍau mahāsurau

uvāca kālīṁ kalyāṇī lalitaṁ caṇḍikā vacaḥ

yasmāc caṇḍaṁ ca muṇḍaṁ ca gṛhītvā tvam upāgatā

cāmuṇḍeti tato loke khyātā devi bhaviṣyasi