rājovāca

vicitram idam ākhyātaṁ bhagavan bhavatā mama

devyāś caritamāhātmyaṁ raktabījavadhāśritam

bhūyaś cecchāmy ahaṁ śroturṁ raktabīje nipātite

cakāra śumbho yatkarma niśumbhaś cātikopanaḥ

ṛṣir uvāca

cakāra kopām atulaṁ raktabīje nipātite

śumbhāsuro niśumbhaś ca hateṣv anyeṣu cāhave

hanyamānaṁ mahāsainyaṁ vilokyāmarṣam udvahan

abhyadhāvan nisumbho ’tha mukhyayāsurasenayā

tasyāgratas tathā pṛṣṭhe pārśvayoś ca mahāsurāḥ

sandaṣṭauṣṭhapuṭāḥ kruddhā hantuṁ devīm upāyayuḥ

ājagāma mahāvīryaḥ śumbho ’pi svabalair vṛtaḥ

nihantuṁ caṇḍikāṁ kopāt kṛtvā yuddhaṁ tu mātṛbhiḥ

tato yuddham atīvāsīd devyā śumbhaniśumbhayoḥ

śaravarṣam atīvograṁ meghayor iva varṣatoḥ

cicchedāstāñ charāṁs tābhyāṁ caṇḍikā svaśarotkaraiḥ

tāḍayāmāsa cāṅgeṣu śastraughair asureśvarau

niśumbho niśitam khaḍgaṁ carma cādāya suprabham

atāḍayan mūrdhni simhaṁ devyā vāhanam uttamam

tāḍite vāhane devī kṣurapreṇāsim uttamam

niśumbhasyāśu ciccheda carma cāpyaṣṭacandrakam

chinne carmaṇi khaḍge ca śaktiṁ cikṣepa so ’suraḥ

tām apy asya dvidhā cakre cakreṇābhimukhāgatām

kopādhmāto niśumbho ’tha śūlam jagrāha dànavaḥ

āyāntaṁ muṣṭipātena devī tac cāpy acūrṇayat

āvidhyātha gadām so ’pi cikṣepa caṇḍikām prati

sāpi devyā triśūlena bhinnā bhasmatvam āgatā

tataḥ paraśuhastaṁ tam āyāntaṁ daityapuṅgavam

āhatya devī bāṇaughair apātayata bhūtale

tasmin nipātite bhūmau niśumbhe bhīmavikrame

bhrātary atīva samkruddhaḥ prayayau hantum ambikām

sa rathasthas tathāty uccair grhītaparamāyudhaiḥ

bhujair aṣṭābhir atulair vyāpyāśeṣaṁ babhau nabhaḥ

tam āyāntaṁ samālokya devī śankham avādayat

jyāśabdaṁ cāpi dhanuṣaś cakārātīva duḥsaham

pūrayāmāsa kakubho nijaghaṇṭāsvanena ca

samastadaityasainyānām tejovadhavidhāyinā

tataḥ siṁho mahānādais tyājitebhamahāmadaiḥ

pūrayāmāsa gaganaṁ gāṁ tathopadiśo daśa

tataḥ kālī samutpatya gaganaṁ kṣmām atāḍayat

karābhyāṁ tan ninādena prāksvanāste tirohitāḥ

aṭṭāṭṭahāsam aśivam śivadūtī cakāra ha

taiḥ śabdair asurās tresuḥ śumbhaḥ kopaṁ paraṁ yayau

durātmaṁs tiṣṭha tiṣṭheti vyājahārāmbikā yadā

tadā jayety abhihitaṁ devair ākāśasaṁsthitaiḥ

śumbhenāgatya yā śaktir muktā jvālātibhīṣaṇā

āyāntl vahnikūṭābhā sā nirastā maholkayā

siṁhanādena śumbhasya vyāptaṁ lokatrayāntaram

nirghātaniḥsvano ghoro jitavān avanīpate

śumbhamuktāñ charān devī śumbhas tatprahitān charān

ciccheda svaśarair ugraiḥ śataśo ’tha sahasraśaḥ

tataḥ sā caṇḍikā kruddhā śūlenābhijaghāna tam

sa tadābhihato bhūmau mūrcchito nipapāta ha

tato niśumbhah samprāpya cetanām āttakārmukaḥ

ājaghāna śarair devīṁ kālīṁ kesariṇaṁ tathā

punaś ca kṛtvā bāhūnām ayutaṁ danujeśvaraḥ

cakrāyudhena ditijaś chādayāmāsa caṇḍikām

tato bhagavatī kruddhā durgā durgārtināśiṇī

ciccheda tāni cakrāṇi svaśaraiḥ sāyakāṁś ca tān

tato niśumbho vegena gadām ādāya caṇḍikām

abhyadhāvata vai hantuṁ daityasenāsamāvṛtaḥ

tasyāpatata evāśu gadāṁ ciccheda caṇḍikā

khaḍgena śitadhāreṇa sa ca śūlaṁ samādade

śūlahastaṁ samāyāntaṁ niśumbham amarārdanam

hṛdi vivyādha śūlena vegāviddhena caṇḍikā

bhinnasya tasya śūlena hṛdayān niḥsṛto ’paraḥ

mahābalo mahāvīryas tiṣṭheti puruṣo vadan

tasya niṣkrāmato devī prahasya svanavat tataḥ

śiraś ciccheda khaḍgena tato ’sāvapatad bhuvi

tataḥ siṁhaś cakhādogradaṁṣṭrākṣuṇṇaśirodharān

asurāṁs tāṁs tathā kālī śivadūtī tathāparān

kaumārīśaktinirbhinnāḥ kecin neśur mahāsurāḥ

brahmāṇīmantrapūtena toyenānye nirākṛtāḥ

māheśvarītriśūlena bhinnāḥ petus tathāpare

vārāhītuṇḍaghātena kecic cūrṇīkṛtā bhuvi

khaṇḍaṁ khaṇḍaṁ ca cakreṇa vaiṣṇavyā dānavāḥ kṛtāḥ

vajreṇa caindrīhastāgravimuktena tathāpare

kecid vineśur asurāḥ kecin naṣṭā mahāhavāt

bhakṣitāś cāpare kālīśivadūtīmṛgādhipaiḥ