Avant venue de ruine Celtique,
Dedans le temple deux parlamenteront:
Poignard cueur, d'vn monté au coursier & pique,
Sans faire bruit le grand enterreront.
Sept coniurés au banquet feront luyre,
Contre les trois le fer, hors de nauire:
L'vn les deux classes au grand fera conduire,
Quand par le mail. Denier au front luy tire.
Le successeur de la duché viendra,
Beaucoup plus oultre que la mer de Tosquane:
Gauloise branche la Florence tiendra,
Dans son giron d'accord nautique Rane.
Le gros mastin de cité deschassé,
Sera fasché de l'estrange alliance.
Apres aux champs auoir le cerf chassé,
Le loup & l'Ours se donront deffiance.
Soubz vmbre faincte d'oster de seruitude,
Peuple & cité l'vsurpera luy mesmes:
Pire fera par fraulx de ieune pute,
Liuré au champ lisant le faulx proesme.
Au roy l'Augur sus le chef la main mettre
Viendra prier pour la paix Italique:
A la main gauche viendra changer le sceptre
De Roy viendra Empereur pacifique.
Du Triumuir seront trouuez les os,
Cherchant profond tresor aenigmatique,
Ceulx d'alentour ne seront en repos,
De concauer marbre & plomb metallique.
Sera laissé le feu vif, mort caché,
Dedans les globes horrible espouuentable
De nuict à classe cité en pouldre lasché,
La cité à feu, l'ennemy fauorable.
Iusques aux fondz la grand arq demolue,
Par chef captif l'amy anticipé:
Naistra de dame front face cheuelue,
Lors par astuce duc à mort attrape.
Vn chef Celtique dans le conflict blessé,
Aupres de caue voyant siens mort abatre:
De sang & playes & d'ennemis pressé,
Et secourus par incognuz de quatre.
Mer par Solaires seure ne passera,
Ceulx de Venus tiendront toute l'Affrique:
Leur regne plus Sol, Saturne n'occupera,
Et changera la part Asiatique.
Aupres du lac Leman sera conduite,
Par garse estrange cité voulant trahir:
Auant son meurtre à Auspourg la grand suitte,
Et ceulx du Ryn la viendront inuahir.
Par grand fureur le roy Romain Belgique,
Vexer vouldra par phalange barbare:
Fureur grinsseant, chassera gent lybique,
Despuis Pannons iusques Hercules la hare.
Saturne & Mars en leo Espagne captiue,
Par chef lybique au conflict attrapé,
Proche de Malthe, Heredde prinse viue,
Et Romain sceptre sera par coq frappé.
En nauigant captif prins grand pontife,
Grand apretz faillir les clercz tumultuez:
Second esleu absent son bien debife,
Son favory bastard à mort tué.
A son hault pris plus la lerme sabee,
D'humaine chair par mort en cendres mettre:
A l'isle Pharos par croisars pertubee,
Alors qu'a Rodes paroistra dur espectre.
De nuict passant le roy pres d'vne Andronne,
Celuy de Cipres & principal guette:
Le roy failli la main fuict long du Rosne,
Les coniurés l'iront a mort mettre.
De dueil mourra l'infelix profligé,
Celebrera son vitrix l'heccatombe:
Pristine loy, franc edict redigé,
Le mur & Prince au septiesme iour tombe.
Le grand Royal d'or, d'aerain augmenté,
Rompu la pache, par ieune ouuerte guerre:
Peuple affligé par vn chef lamenté,
De sang barbare sera couuerte terre.
Dela les Alpes grand armée passera,
Vn peu deuant naistra monstre vapin:
Prodigieux & subit tornera,
Le grand Tosquan à son lieu plus propin.
Par le trespas du monarque latin,
Ceulx qu'il aura par regne secouruz:
Le feu luyra, diuisé le butin,
La mort publique aux hardis incoruz.
Auant, qu'à Rome grand aye rendu l'ame,
Effrayeur grande à l'armée estrangiere:
Par Esquadrons, l'embusche pres de Parme,
Puis les deux roges ensemble feront chere.
Les deux contens seront vnis ensemble,
Quand la pluspart à Mars seront conioinct:
Le grand d'Affrique en effraieur & tremble,
DVVMVIRAT par la classe desioinct.
Le regne & loys soubz Venus esleué,
Saturne aura sus Iupiter empire:
La loy & regne par le Soleil leué,
Par Saturnins endurera le pire.
Le prince Arabe Mars, Sol, Venus, Lyon,
Regne d'Eglise par mer succombera:
Deuers la Perse bien pres d'vn million,
Bisance, Egypte ver. Serp. inuadera.
La gent esclaue par vn heur martial,
Viendra en hault degré tant esleuee:
Changeront prince, naistre vn provincial,
Passer la mer copie aux monts levee.
Par feu & armes non loing de la marnegro,
Viendra de Perse occuper Trebisonde:
Trembler Phatos Methelin, Sol alegro,
De sang Arabe d'Adrie couuert vnde.
Le bras pendu & la iambe liee,
Visaige pasle au seing poignard caché:
Trois qui seront iurés de la meslee,
Au grand de Gennes sera le fert lasché.
La liberté ne sera recouuree,
L'occupera noir fier vilain inique:
Quant la mariere du pont sera ouuree,
D'Hister, Venise faschee la republique.
Tout à l'entour de la grande cité,
Seront soldartz logés par champs & ville:
Donner l'assault Paris, Rome incité,
Sur le pont lors sera faicte, grand pille.
Par terre Attique chef de la sapience,
Qui de present est la rose du monde:
Pont ruyné & sa grand preeminence,
Sera subdite & naufrage des vnde:
Ou tout bon est, tout bien Soleil & lvne,
Est abondant sa ruyne s'approche:
Du ciel s'aduance vaner ta fortune,
En mesme estat que la septiesme roche.
Des principaulx de cité rebellee,
Qui tiendront fort pour liberté rauoir:
Detrencher masles infelice meslee,
Crys hurlemens à Nantes piteux voir.
Du plus profond de l'occident Anglois.
Ou est le chef de l'isle britannique:
Entrera classe dans Gyronde par Blois,
Par vin & sel, ceuz cachés aux barriques.
Par cité franche de la grand mer Seline,
Qui porte encores à l'estomach la pierre:
Angloise classe viendra soubz la bruine,
Vn rameau prendre du grand ouuerte guerre.
De soeur le frere par simulte faintise,
Viendra mesler rosee en myneral:
Sur la placente donne à vieille tardifue,
Meurt. le goustant sera simple & rural.
Trois cents feront d'vn vouloir & accord,
Que pour venir au bout de leur attainte:
Vingtz moys apres. tous & recordz,
Leur roy trahir simulant haisne saincte.
Ce grand monarque qu'au mort succedera
Donnera vie illicite & lubrique:
Par nonchalance à tous concedera,
Qu'a la parfin fauldra la loy Salique.
Du vray rameau de fleur de lys issu,
Mis & logé heritier d'Hetrurie:
Son sang antique de longue main tissu,
Fera Florence florir en l'armoirie.
Le sang royal sera si tresmeslé,
Contraint seront Gaulois de l'Hesperie
On attendra que terme soit coulé,
Et que memoire de la voix soit perie.
Nay soubz les vmbres & iournee nocturne,
Sera en regne & bonté souueraine:
Fera renaistre son sang de l'antique vrne,
Renouuelant siecle d'or pour l'aerain.
Mars esleué en son plus hault beffroy,
Fera retraire les Allobrox de France:
La gent Lombarde fera si grand effroy,
A ceux de l'Aigle comprins soubz la balance.
La grande ruyne des sacrés ne s'esloigne,
Prouence, Naples, Sicille, seez & Ponce:
En Germanie, au Ryn & la Cologne,
Vexés à mort par tous ceulx de Magonce.
Par mer le rouge sera prins des pyrates,
La paix sera par son moyen troublee:
L'ire & l'auare commettra par fainct acte,
Au grand Pontife sera l'armee doublee.
Le grand Empire sera tost desollé,
Et translaté pres d'ardue ne silue:
Les deux bastardz par l'aisné decollé,
Et regnera Aenobarb. nez de milue.
Par chapeaux rouges querelles & noueaux scismes,
Quant on aura esleu le Sabinois:
On produira contre luy grands sophismes,
Et sera Rome lesee par Albanois.
Le grand Arabe marchera bien auant,
Trahy sera par les Bisantinois:
L'antique Rodes luy viendra au deuant,
Et plus grand mal par aultre Pannonois.
Apres la grande affliction du sceptre,
Deux ennemis par eulx seront deffaictz:
Classe d'Affrique aux Pannons viendra naistre,
Par mer & terre seront horribles faictz.
Nul de l'Espaigne, mais de l'antique France,
Ne sera esleu pour le tremblant nacelle:
A l'ennemy sera faicte fiance,
Qui dans son regne sera peste cruelle.
L'an que les freres du lys seront en aage,
L'vn d'eulx tiendra la grande Romanie:
Trembler les monts, ouuert latin passaige,
Pache macher contre fort d'Armenie.
La gent de Dace, d'Angleterre & Polonne
Et de Bohesme feront nouuelle ligue:
Pour passer oultre d'Hercules la colonne,
Barcins, Tyrrens dresser cruelle brigue.
Vn Roy sera qui donra l'opposite,
Les exilés esleués sur le regne:
De sang nager la gent caste hyppolite,
Et florira long temps soubz telle enseigne.
La loy du Sol, & Venus contendens,
Appropriant l'esprit de prophetie:
Ne l'vn, ne l'autre ne seront entendens,
Par Sol tiendra la loy du grand Messie.
Du pont Euxine, & la grand Tartarie,
Vn roy sera qui viendra voir la Gaule:
Transpercera Alane & l'Armenie,
Et dans Bisance lairra sanglante Gaule.
De la felice Arabie contrade,
Naistra puissant de loy Mahometique:
Vexer l'Espaigne, conquester la Grenade,
Et plus par mer à la gent lygustique.
Par le trespas du tresvieillart pontife,
Sera esleu Romain de bon aage:
Qu'il sera dict que le siege debiffe,
Et long tiendra & de picquant ouuraige.
Istra du mont Gaulfier & Auentin,
Qui par le trou adhertira l'armee:
Entre deux rocz sera prins le butin,
De SEXT. mansol faillir la renommee.
De l'aqueduct d'Vticense, Gardoing,
Par la forest & mont Inaccessible:
En my du pont sera tasché au poing,
Le chef Nemans & qui tant sera terrible.
Au chef Anglois à Nymes trop seiour,
Deuers l'Espaigne au secours Aenobarbe:
Plusieurs mourront par Mars ouvert ce iour,
Quand en Artoys faillir estoille en barbe.
Par teste rase viendra bien mal eslire,
Plus que sa charge ne porte passera:
Si grand fureur & raige fera dire,
Qu'a feu & sang tout sexe trenchera.
L'enfant du grand n'estant à sa naissance,
Subiuguera les haultz monts Apennis:
Fera trembler tous ceulx de la balance,
Et des monts feux iusques à mont Senis.
Sur les rouchers sang on verra plouuoir,
Sol Orient, Saturne Occidental:
Pres d'Orgon guerre, à Rome grand mal voir,
Nefz parfondrees & prins le Tridental.
De vaine emprise l'honneur indue plaincte,
Gallotz errans par latins froit, faim, vagues
Non loing du Tymbre de sang terre taincte,
Et sur humains seront diuerses plagues.
Les assemblés par repoz du grand nombre,
Par terre & mer conseil contremandé:
Pres de l'Autonne Gennes, Nice de l'ombre
Par champs & villes le chef contrebandé.
Subit venu l'effrayeur sera grande,
Des principaulx de laffaire cachés:
Et dame en braise plus ne sera en veue,
De peu à peu seront les grans faschés.
Soubz les antiques edifices vestaulx,
Non esloignez d'aqueduct ruyne:
De Sol & Luna sont les luysans metaulx,
Ardante lampe Traian d'or burine.
Quant chef Perouse n'osera sa tvnique,
Sans au couuert tout nud s'expolier:
Seront prins sept faict Aristocratique,
Le pere & filz mors par poincte au colier.
Dans le Dannube & du Rin viendra boire,
Le grand Chameau ne s'en repentira:
Trembler du Rosne & plus fort ceux de loire
Et pres des Alpes coq le ruinera.
Plus ne sera le grand en faulx sommeil,
L'inquietude viendra prendre repoz:
Dresser phalange d'or, azur, & vermeil,
Subiuger Affrique la ronger iusques aux oz.
Des regions subiectes à la Balance,
Feront troubler les monts par grande guerre
Captifz tout sexe deu & tout bisance,
Qu'on criera a l'aube terre a terre.
Par la fureur d'vn qui attendra l'eau,
Par sa grand raige, tout l'exercite esmeu:
Chargé des nobles à dixsept bateulx,
Au long du Rosne tard messagier venu.
Pour le plaisir d'edict voluptueux,
On meslera la poyson dans l'aloy:
Venus sera en cours si vertueux,
Qu'obfusquera du Soleil tout aloy.
Persecutee sera de Dieu l'Eglise,
Et les sainctz temples seront expoliez:
L'enfant la mere mettra nud en chemise,
Seront Arabes aux Polons raliez.
De sang Troyen naistra coeur Germanique
Qu’il deuiendra en si haulte puissance:
Hors chassera gent estrange Arabique,
Tournant l'eglise en pristine preeminence.
Montera hault sur le bien plus à dextre,
Demourra assis sur la pierre quarree:
Vers le midy posé à la fenestre,
Baston tortu en main, bouche serree.
En lieu libere tendra son pauillon,
Et ne vouldra en cités prendre place:
Aix, Carpens l'isle volce, mont Cauaillon,
Par tous ses lieux abolira la trasse.
Tous les degrez d'honneur ecclesiastique,
Seront changez en dial quirinal:
En Martial quirinal flaminique,
Puis vn Roy de France le rendre vulcanal.
Les deux vniz ne tiendront longuement,
Et dans treze ans au Barbare satrappe:
Au deux costez feront tel perdement,
Qu'on benyra le Barque & sa cappe.
La sacree pompe viendra baisser les aesles
Par la venue du grand legislateur:
Humble haulsera vexera les rebelles,
Naistra sur terre aucun aemulateur.
Logmion grand bisance aprouchera,
Chassé sera la barbarique ligne:
Des deux loix l'vne l'estinique lachera,
Barbare & franche en perpetuelle brigue.
L'oiseau royal sur la cité solaire,
Sept moys deuant fera nocturne augure:
Mur d'Orient cherra tonnaire, esclaire,
Sept iours aux portes les ennemis à lheure.
Au conclud pache hors de la forteresse,
Ne sortira celuy en desespoir mys:
Quant ceux d'Arbois, de Langres, contre Bresse,
Auront monts, Dolle, bouscade d'ennemis.
Ceulx qui auront entreprins subuertir,
Nompareil regne puissant & inuincible:
Feront par fraulde, nuictz trois aduertir,
Quant le plus grand à table lira Bible.
Naistra du goulphre & cité immesuree,
Nay de parents obscurs & tenebreux:
Qui la puissance du grand roy reveree,
Vouldra destruire par Rouan & Eureux.
Par les Sueues & lieux circonuoisins,
Seront en guerre pour cause des nuees:
Camp marins locustes & cousins,
Du Leman faultes seront bien desnuees.
Par les deux testes & trois bras separés,
La cité grande par eaulx sera vexee:
Des grans d'entre eulx par exil esgarés,
Par teste perse Bisance fort pressee.
L'an que Saturne sera hors de seruaige,
Au franc terroir sera d'eaue invndé:
De sang Troyen, sera son mariage,
Et sera seur d'Espaignolz circunder.
Sur le sablon par vn hideux deluge,
Des autres mers trouué monstre marin:
Proche du lieu sera faict vn refuge,
Tenant Sauone esclaue de Turin.
Dedans Hongrie par Boheme, Nauarre,
Et par banniere sainctes seditions:
Par fleurs de lys pays pourtant la barre,
Contre Orleans sera esmotions.
Dans les cyclades, en perinthe & larisse,
Dedans l’Sparte tout le Pelloponnesse:
Si grand famine, peste, par faulx connisse,
Neuf moys tiendra & tout le cherrouesse.
Au grand marché qu'on dict des mensongiers,
Du bout Torrent & camp Athenien:
Seront surprins par les cheuaulx legiers,
Par Albanois Mars, Leo, Sat. vn versien.
Apres le siege tenu dixsept ans,
Cinq changeront en tel reuolu terme:
Puis sera l'vn esleu de mesme temps,
Qui des Romains ne sera trop conforme.
Soubz le terroir du rond globe lunayre,
Lors que sera dominateur Mercure:
L'isle d'Escosse fera vn luminaire,
Qui les Anglois mettra à desconfiture.
Translatera en la grand Germanie,
Brabant & Flandres, Gand, Bruges, & Bologne:
La trefue fainte le grand duc d'Armenie,
Assaillira Vienne & la Coloigne.
Nautique rame inuitera les vmbres,
Du grand Empire lors viendra conciter:
La mer Aegée des lignes les encombrés
Empeschant l'onde Tyrrene defflotez.
Sur le millieu du grand monde la rose,
Pour nouueaux faicts sang public espandu:
A dire vray on aura bouche close,
Lors au besoing viendra tard l'attendu.
Le nay difforme par horreur suffoqué,
Dans la cité du grand Roy habitable:
L'edict seuere des captifz reuoqué,
Gresle & tonnerre. Condom inestimable.
A quarante huict degré climaterique,
A fin de Cancer si grande seicheresse:
Poisson en mer, fleuue, lac cuit hectique,
Bearn, Bigorre. par feu ciel en destresse.
Milan, Ferrare, Turin, & Aquilleye,
Capne, Brundis vexés par gent Celtique:
Par le Lyon & phalange aquilee,
Quant Rome aura le chef vieulx Britannique.
Le boutefeu par son feu attrapé,
Du feu du ciel à Carcas & Cominge:
Foix, Aux, Mazeres, hault vieillart eschapé,
Par ceulx de Hasse, des Saxons & Turinge.