A staan vir Attie Aap
wat aanhou g-a-a-a-a-a-a-a-a-p
as hy saans al die skape
van die man op die maan
lê en tel om te kan slaap.
Nog woorde:
appelliefie en appelkoos;
akkedis en akrobaat;
albaster – aha, Afrika!
B staan vir Bella,
sy’s ’n bielie van ’n beer!
Met haar ronde boepmagie
slaan sy woerts BOLLEMAKIESIE
oor die brandweerman se leer.
Nog woorde:
bobbejaan en bokmakierie;
bokkoms en blomkool;
bakbene en besems!
C staan vir Charlie Cheetah,
hy’s lekker laf
waar hy met sy rugbybal
en cowboy-hoed
deur die strate van Calvinia draf.
Nog woorde:
Celsius en Cecile;
cheddarkaas en Coca-Cola.
D staan vir Dirk Donkie
wat elke dag dawerend
langs die draad
staan en sing:
“Ooo, die donkie is ’n wonderlike ding!”
Nog woorde:
drieling, driehoek en driewiel;
dolfyn, donderweer en
drommedaris …
’n diamant!
E staan vir Erik Eland
wat heel goed weet
dat hy elke liewe dag
een REUSEPEER
te veel
eet!
Nog woorde:
eekhoring, eetlepel en eendbekdier;
elmboog, elders en enkel …
’n engel!
F staan vir die fraaie Fienie Flamink,
die lieflike wyfie
met die fietse pienk lyfie
en die krullertjies in haar kuifie.
Nog woorde:
fluitjie, fluweel en flikker;
frommel, frikkadel en framboos …
Februarie!
G staan vir gawe Grietjie Gans
wat so lekkerlyf giggel
as sy die GOGGABIE-BOOGIE
in haar goudgeel rokkie dans.
Nog woorde:
gogga, grapjas en galjoen;
geelrys, glinster en glips …
’n gemmerbroodman!
H staan vir Hendrik,
die hinkepink haas,
wat ’n hoenderhen wil hê
om ’n honderd haastige paaseiers
net vir hom te lê.
Nog woorde:
hooimied en hommelby;
heuning en helikopter;
hanswors en hartedief!
I staan vir Ina Inkvis.
Sy sit haar RINGE aan,
skud haar vinne los
en dan sing en rinkink
sy in die inkswart see.
Nog woorde:
Italië en ivoor;
ietermago en indoena.
J staan vir Joos,
die jolige jakkals van oom Koos.
Die twee jakker oral waar hulle gaan,
van Johannesburg tot in Japan!
Nog woorde:
jakaranda, jasmyn en Januarie;
jonk, jeuk en juwele;
jellievis en Jeep!
K staan vir Kobus,
die kielierige krokodil.
As olifant sy slurp in die water steek,
kriewel
hy van kop tot tone soos
hy gril!
Nog woorde:
koljander, koggelmander en kalbas;
krabbel, kraaines en krummel …
en kyk, ’n koeksister!
L staan vir Lourens,
’n liewe, lawwe leeu.
Hy lag hom elke dag slap
vir die likkewaan se flou grap.
Nog woorde:
lietsjie, lemoen en lepel;
lantern, luiperd en lappies laventel!
M staan vir Miemie,
die mooie muise-ma.
Sy vat haar kleine muisies
elke Maandagmôre vroeg
vir melk en malvalekkers
na die mallemeule toe.
Nog woorde:
moerbeie, mielies en mikroskoop;
madeliefie, mamba, matroos …
en maanskyn ook!
N staan vir Nina,
die singende nagtegaal.
Sy gaan haar nege towernote
hoog uit die hemel haal
om vannag nog in die nartjieboom
die klanke soet te sing.
Nog woorde:
Noag, nommer en noord;
narsing, naald en nag!
O staan vir oom Okkie Olifant –
hy mag net met tant Otjie Potjie trou,
as hy ook leer om net soos sy,
sy groot, vet lyf morsjors te hou.
Nog woorde:
orgidee, orkes en orkaan;
otter, oorbel en oseaan!
P staan vir prinses
Petronella Pikkewyn,
wie se pienk pantoffels
haar arme plat pote
die hele ent pad
laat pyn.
Nog woorde:
papier, papegaai en pampoen;
piesang, poedel en poeding!
Q staan vir Quintin Quetzal,
wat van ver
uit die woude in Suid-Amerika,
een van sy
lang,
goudgroen
stertvere
aanstuur vir sy ouma Quarta,
in haar huisie bo
in die berge van Qwaqwa.
Nog woorde:
Q-boot, quiche en Quasimodo.
R staan vir Ronnie Renoster –
dié rakker is ’n rustige reus
al dra hy twéé horings,
soos nare groot dorings
op sy rimpelrige neus.
Nog woorde:
rommel, rondawel en rampokker;
ridder, rapport en radys;
resep en rondomtaliedraai!
S staan vir die skaam Skillie Skilpad –
en weet jy wat?
As ek net saggies aan hom vat,
pieps hy my skielik
PAPSOPNAT!
Nog woorde:
sprokie, spookasem, springbok;
sambrele, sterre …
en stroop ook!
T staan vir Trompie Tarentaal –
In die taxi tokkel hy
op sy blikkitaar
met net een enkele
flentersnaar.
Nog woorde:
towenaar, toffie en toktokkie;
teddiebeer, telefoon en toebroodjie …
klein tinktinkie!
U staan vir arme Ursula Uil
wat u-u-u-ure lank
in die donker
langs die kuil
saam met die vuil ou muil
sit en “hoe-hoe-hoe” huil.
Nog woorde:
unie, uniform en universiteit.
V staan vir Vollie Verkleurmannetjie,
die vent met die vreemde knoppiesjas.
Vyftig vrot vlieë op sy
VERJAARDAGKOEK
sal hom regtig goed pas!
Nog woorde:
vrede, vroetel, verjaar en verlep;
vonkel, viool, vaatjie en valskerm!
W staan vir Willem Walvis
wat wil weet
of ’n walvis
ook waatlemoen mag eet.
Nog woorde:
wekker, wêreld en westewind;
wimpers, wiskunde en winter …
kyk, die wolke!
X staan vir die zZz
in Xander se naam –
wat ook klink soos die zZz
van sy bont xilofoon.
Maar X klink soos EKS
as hy vir X-STRALE
hospitaal toe moet gaan.
Nog woorde:
xilofoon en xerofiet;
Xhosa.
Y staan vir Ysie Ysbeer
wat al te bly
op Vrydae
saam met my
al in die rondte
op sy ysskaat se gly.
Nog woorde:
ystervark, Ysland, ysterhand …
ysige ysreën!
Z staan vir Zizi die Zambezi-haai
wat zzzzzzzirts
soos ’n warrelwind
kan tiekiedraai!
Nog woorde:
Zoeloe en zoem;
Zimbabwe en zombie!