Awit Para sa Mamang Magbabalut
Kung mamamakyaw kaya ako at mamamapak
Ng balut
Lalakas kaya ang tuhod o loob,
Para masabing
Kung mamamapak kaya ako at babangka
Ng kwento
Tatagal kaya ang resistensya o pagkikita
Para masabing
Kung babangka kaya ako at magdadagdag
Ng sitsaron
Maiibigan kaya ang pagbili o pagngiti
Para masabing
Kung magdadagdag kaya ako at tutungga
Ng suka
Mapapansin kaya ang pagdila o luha
Para masabing
Kung tutungga kaya ako at magpapaalam
Ng paghanga
Ikagulat kaya ang kabaduyan o bagal
Para masabing
Kung magpapaalam kaya ako at dudukot
Ng pamasahe
Aalis kaya ang libog o hinayang
Para masabing
Kung dudukot kaya ako at manakot
Ng lamok
Maburyong kaya ang gabi o malugi
Para masabing
Kung manakot kaya ako at lalayo
Ng lakad
Maiisip kayang nagkurus ang landas o magmadali
Para masabing
Buo na ang gabi
Nitong binatilyong namamalikmata sa iyo!