The Paris Psalter: Psalm 126

 

Nymþe hus timbrige      halig drihten,

 

on idel gylp      oðre winnað[?]

 

þe þæs huses      hrof staðeliað.

 

Nymðe gehealde eac      halig drihten

5

ceastre mid cynnum,      ne mæg hi cynlice

 

wæccende[?]      weard gehealdan.

 

Forhwan ge mid idelnesse      ealle arisað,

 

ærðon leoht cume      leoda bearnum?

 

Arisað nu ricene,      and hraðe sittað,

10

þa ðe sares hlaf      swiðe æton.

 

þonne he slæp syleð      swiðe leofum;

 

þæt is yrfe eac      ecean drihtnes

 

and herde bearn,      þa her mannum beoð

 

of innaðe      ærest cende.

15

Swa seo stræle byð      strangum and mihtigum

 

hrorum on handa      heard ascyrped,

 

swa lyðra bearn      lungre gewitað.

 

þæt bið eadig wer,      se ðe a þenceð,

 

þæt he his lust on ðon      leofne gefylle;

20

ne bið he on ealdre ealre      æfre gescended,

 

þonne he on gaton greteð      his grame feondas.