The Paris Psalter: Psalm 60

 

Gehyr, halig god,      hraþe mine bene,

 

beheald mine gebed      holde mode.

 

Nu ic of eorðan      utgemærum

 

cleopige to þe,      nu me caru beateð

5

heard æt heortan,      help min nu þa;

 

ahefe me holdlice      on halne stan.

 

þu me gelæddest      mid lufan hyhte,

 

wære me se stranga tor      stið wið feondum.

 

Ic eardige      awa to feore

10

on ðinum selegesceote;      þær me softe byð,

 

þær ic beo fægere beþeaht      fiðerum ðinum.

 

Forðon ðu gehyrdest,      halig drihten,

 

hu min gebed to ðe      beorhte eode;

 

yrfe þu sealdest      anra gehwylcum,

15

se þe naman ðinne      þurh neod forhtað.

 

Dæg byð ofer dæge,      þær byð gedefe cynincg;

 

beoð his winter eac      wynnum iced,

 

oð þone dæg þe he[?]      on drihtnes sceal

 

on ansyne      andweard gangan,

20

and þær to worlde      wunian ece.

 

Hwylc seceð þæt      þe soðfæst byð?

 

Swa ic naman ðinum      neode singe,

 

þæt ic min gehat      her agylde

 

of dæge on dæg,      swa hit gedefe wese.