The Paris Psalter: Psalm 81

 

God mihtig stod      godum on gemange,

 

and he hi on midle      mægene tosceadeð.

 

Hu lange deme ge      domas unrihte,

 

and ge onfoð ansyna      synnwyrcendra?

5

Demað steopcildum      domas soðe

 

and eadmedum      eac þæt sylfe,

 

wædlum and ðearfum      wel soðfæstum.

 

Ge[?] of firenfulra      fæcnum handum

 

þearfan and wædlan      þriste alysað.

10

Ne ongeatan hi      ne geara wistan,

 

ac hi on ðystrum      þrage eodan;

 

ealle abeofedan      eorðan staþelas.

 

Ic ærest cwæð:      "Ge synd uppe godu,

 

ealle uphea,      and æðele bearn.

15

Ge þonne sweltað      samod mid mannum,

 

swa ealdormann      an gefealleð."

 

Aris drihten, nu!      Dem eorðware,

 

forþan þu eart erfeweard      ealra ðeoda.