Ballade

(Ballade des dames du temps jadis)

Dictes moy ou n’en quel pays

Est Flora la belle Romaine,

Archipïadés¹ ne Thaÿs,

Qui fut sa cousine germaine,

Echo parlant quant bruyt on maine

Dessus riviere ou sur estan,

Qui beaulté ot trop plus qu’umaine.

Mais ou sont les neiges d’anten²?

Ou est la tres saige Esloÿs,

Pour qui chastré fut et puis moyne

Pierre Esbaillart a Saint Denys?

Pour son amour eust ceste essoyne³.

Semblablement, ou est la royne

Qui commanda que Buriden

Fust gecté en ung sac en Saine?

Mais ou sont les neiges d’anten?

La Royne Blanche comme liz

Qui chantoit a voix de seraine,

Berte au plat pié⁴, Bietrix, Aliz,

Haranburgis qui tint le Maine,

Et Jehanne la bonne Lorraine

Qu’Engloys brulerent a Rouen,

Ou sont ilz, ou, Vierge souveraine?

Mais ou sont les neiges d’anten?

Prince, n’enquerrez de sepmaine

Ou elles sont ne de cest an

Qu’a ce reffraing ne vous remaine:

Mais ou sont les neiges d’anten?

¹ Nel Roman de la Rose (vv. 8939 sgg.) venivano esaltate le qualità del corpo di Alcibiade: il che spiega come potesse essere incluso tra le donne.

² Questa ballata di Villon ha reso immortale la locuzione d’antan, in un senso leggermente diverso da quello originario («dell’anno scorso»).

³ Lett.: «mutilazione» e, da qui, «sciagura» in senso morale.

⁴ È la moglie di Pipino il Breve, meglio nota come «Berta dal grande piede».