Pūwhero ana a Ranginui i te atatū, whakapapa pounamu ana a Tangaroa e mānu nei ki te pae tawhiti. Ko Karoro me ōna hoa e topa whakarunga ana i ngā hau maiangiangi a Tāwhirimātea. He rapu kai tā rātou mahi.
‘He aha ngā mea e pīataata ana i raro rā’ te kī a Karoro.
‘Ehara i te ika, i te pipi rānei?’
Takoto noa ana ngā mea pīataata rā i te oneone mā ki Tokomaru. Kāore i neke, kāore i nuku. Tau mai ana a Karoro mā ki te whakamātautau ēnei mea pīataata, ina he kai reka. I te timonga atu a Karoro ka oreore te oneone mā ki raro, ko Hineoneone e kohetehete ana ki a ia.
‘E Ka, rere atu rā! Ehara ēnei taonga i te kai māhau. Nōku kē ēnei para pounamu. Nā te au me ngā ngaru a taku kōkā a Hinemoana ngā para pounamu i hura kia kitea ai o rātou ataahua. Nā mātou anō ngā para pounamu i mirimiri kia whakawātea te mamae ki roto i a rātou. He mokemoke hoki mō tō rātou oneone tapu ki Te Tai Tokerau.’
I ngā wā o mua he koata ēnei para pounamu. Nā te iwi Waewae Nui te koata i waihanga hei taputapu mā rātou. He iwi rerekē a Waewae Nui. He iwi mātau ki te whakamahi i ngā uri a Papatūānuku, a Tangaroa hei pononga mā rātou. He iwi tūkino hoki i taku kōkā i a Hinemoana me āna tamariki. Nā te Waewae Nui ngā kara i hoatu ki te koata kia māmā ai te hokohoko. Ka mutu pea te ataahua o ngā koata nei. He pōhēhē nō ngā koata kua puta rātou ki tētahi ao mōmona rawa atu. Menemene mai ana a Waewae Nui ki a rātou. Tōtika ana te tū a Koata mā me he rōpū tauā kei roto i te kāpata. Kei waho ā rātou pito i ngā momo kai, ngā momo rongoā me ngā momo inu i puritia e rātou. Ā, ko Waipiro, ko Mīere, ko Rongoā ētahi o ā rātou ingoa.
‘Kei whea mai tēnei noho’ te whakaaro o Rongoā.
Ina tūpuhi ana te puku a Waipiro, kāore i te pērā rawa te menemene a Waewae Nui ki a ia. Ngāwari noa iho te whakawhiti i ngā koata. Karawhiua ana te para koata tūpuhi e Waewae Nui ki te rua i te taha o te awa o Mangahauini. Ā, nāwai rā ka mauhere ngā para koata ki roto i te waipuke o taua awa. Totohu ana, huripoki ana a para koata ki roto i te au kōriporipo o te wai. Tukituki ana ia ki a toka, ki a pōhatu e whawhati nei i tōna tinana.
‘Haere mai me hongi tāua’ te tono a Toka.
‘E koe e Koata, ākuni koe i a au’ te kī a Pōhatu.
He pūhaehae nō Toka mā ki te hanga ataahua, ki ngā tae pīataata, ki te kiri māeneene hoki o Koata.
Katakata ana rātou ki a Koata, he anuanu, he pōuri, he koikoi tōna āhua.
E ngana a Koata ki te pupuri i ōna whatinga, ‘Aue tē puritia e! Arohaina mai rā!’ te tangi a Koata.
I te ngarotanga atu ki roto i te au o Mangahauini ka poroporoaki a para koata mā ki a rātou anō.
Rere tonu ana rātou ki te ngutuawa o Mangahauini. I reira rongo ai i te karanga a Hinemoana.
‘Haere mai rā e aku para pounamu, mauria mai rā ngā waihotanga a tō tātou ūkaipō kia miria, kia romia te whatumanawa. Whakarērea ngā tūkinotanga a te iwi kē. Māku koutou e tieki, e poipoi kia whakahokia rā anō tō ataahua.’
I tukuna ngā ngaru e Hinemoana hei āwhina i a Hinetūākirikiri rātou ko Hinetūahoanga, ko Hineoneone ki te romiromi, ki te orooro, ki te mirimiri i a Para pounamu mā.
‘Taro ake te wā he waiwaiā koutou nō ōku tīpuna’ te whakaaro o Hinemoana.
Kua rere atu a Karoro ki te whai i ōna hoa, ka kite a Hinemoana e rūmakina ana ngā para pounamu ki te takutai moana o Tokomaru.