Muia ana te moana e Te Aitanga ā Ikatere, e ngā kanohi moana e mura mai ana, e hūpeke ana. E ngā tama korowhiti a Tangaroa. E ngā wheke e māwhitiwhiti ana. E ngā manaia tiotio e takaore ana i te tipu nō rātou e moe ana. Kōtore whererei ana ngā ika i a rātou e kaukau parahutihuti ana ki tērā pito o te moana huna ai. Korikori ana ngā aihe hīanga, tauhunahuna ana i waenga i ngā toka pokapoka. Kikī ana te ākau i ngā momo tipu mākurakura o te moana. Pāorooro ana te whio a ngā tohorā i te takere o te moana, e whakawhitiwhiti kōrero ana rātou ki a rātou, ngahau ana. I tētahi atu pito o te moana, tū ana ngā pihi a ngā kōura nō te rangona i tētahi tangi ngunguru, ka mutu, mataku ana rātou ka haoa rātou e te kairuku moana.
Nā wai, nā wai kua hāngū katoa te moana. Whatungarongaro ana ngā uri a Tangaroa. Ka tāwariwari, ka hīoioi te moana. Nā konā i mōhio ai a Tama kua hē ia. Ka oma atu a Tama ki ngā toka pokapoka huna ai. Ka hāua ia e Tangaroa. Roa kau iho, ka tūpono a Tangaroa ki a Tohorā nui. Ka kite atu ia i tētahi Tāne e tāpapa ana i taua tohorā. Ko te anau keu o Tangaroa, anō he rimurimu e tīemiemi ana. Kua mōhio ia ko Ikatere tērā.
Ka mea atu a Tangaroa, ‘Kua roa te wā.’
Ka hī ngā pewa a Ikatere i tana kitenga atu i a Tangaroa, ka ui atu, ‘Tangaroa? E aha ana koe i konei?’
Ka urupare a Tangaroa, ‘Kua kite rānei koe i tētahi tama e tāhoe ana i kōnei?’
‘Kāo, heoi anō, i mea mai ngā aihe i tae atu tētahi tama ki a rātou nō rātou e korikori ana. Ko rātou pea ka mōhio,’ te whakautu a Ikatere.
Ka tuku a Tangaroa i ana mihi ki a Ikatere, ā, ka tere tana haere ki te ārohi i ngā aihe. Ka roa, ā, ka kitea rātou e korikori ana, ka pātai atu a Tangaroa, ‘Kua kite rānei koutou i tētahi tama e tāhoe ana i konei?’
Ko te whakautu a ngā aihe, ‘Āe e Tangaroa! Āe! I pātai mai te tama ki a mātou inā he wāhi i konei e taea ai e ia te huna. Nā reira i tukuna ia e mātou ki aua toka pokapoka rā!’
‘Wetiweti ana! Tēnā koutou. Hei te wā tītoki,’ te puaki a Tangaroa.
Ka haerēre haere a Tangaroa ki te rapu, anō he kanohi hōmiromiro. Rapa noa, rapa noa tē kitea. Nā wai, ka tūpono a Tangaroa ki tētahi wahine tino waiwaiā. He roa ōna makawe, he kikorangi ana whatu, he pīataata, anō he whetū e titiwha ana. Kua uhia tana tinana e ngā tipu mākurakura. Mate wahine ana a Tangaroa, e pōhane ana ia ki te wahine waiwaiā nei. Ka tere whakapaipai a Tangaroa i ōna makawe.
Ka whakaioio a Tangaroa i ōna maihara ka mea, ‘Tēnā koe, Hinemoana.’
Waiwai ana ngā karu a Hinemoana i tana kitenga atu i a Tangaroa, ka kī atu a Hinemoana, ‘Kia ora Tangaroa, he aha tāu e hiahia nei?’
Ko te whakahoki a Tangaroa, ‘Kei te raparapa haere ahau i tētahi tama.’
Ka kī atu a Hinemoana, ‘Kua kite atu ahau i a ia, whai mai, māku koe e ārahi atu!’
Haere te wā, ka kite atu rāua i te tama nanakia rā.
Ka kukume a Tangaroa i a ia ka mea, ‘Nāu aku uri i hao, kua hāngū te moana i a koe! Auē taku hinapōuri!’
Ka kangakanga atu a Tama ki a Tangaroa, ka mutu puku ana te rae o Tangaroa.
Ka ūmere a Tama ‘Tukuna au, tukuna au!’
Ka whakatauria e Tangaroa me hāmenetia a Tama. Nā reira ka hurihia e ia a Tama hei ika. Ka mau a Tama ki te takere o te moana mō āke tonu atu.