Ao noa, pō noa te hanga a te hāona waka whāwhai, te kōrerorero a te tangata hīkoikoi tiriti moe kore, te tangi a te waka pirihimana, te waka tūroro, te taraka patu ahi, te aha, te aha o ngā tū reo ārikarika noa atu nei. Hui katoa, ko te reo pakepake tēnei o te Āporo Nui ka tārewa rere nei i te takiwā. Pō atu pō mai, rā atu, rā mai, anō he kapua hiki kore.
Kua waia kē te hunga noho tāone nunui nei, kāre he paku aha ki a rātau, tēnei reo hoihoi rawa atu nei. Heoi anō, ngā taringa pīkari koi a te kurī hīrokiroki, he hoihoi nui taioreore e tūkino ana i ōna taringa, e mate hirinaki moata nei. Waihoki, tana noho kāinga kore.
Ko tana kāinga kē, kai raro iho i te piriti nui o Brooklyn, kai te taha mai o NYC, ā, he momo anga anō tēnei hai patu i te hoihoi nui ki ōna taringa kokoi rawa atu nei. Mai i tana kūaotanga, ā, pakeke noa ake, ka noho moke ia. Ko ia kau hai kaitiaki, ko ia kau hai kaiwhāngai, hai mātua mōna anō. Waihoki, kāre wana hoa kurī, hoa tangata rānei. He kurī wehi kē!
He kongakonga kai ka whāia e te kurī hai whakaora, hai whai pakaritanga māna i roto i te tāone tangata takitahi nui tou o te Āporo Nui.
Ko te wā o te takurua, he wā o te kore, he wā anō o te makiriri taioreore, ā, ka mate te kurī nei ki te whai kaha, ki te tiaki kau iho i a ia anō.
Hīkoi haere, kimi haere ai te kurī hīrokiroki nei i tahi kai māna i te atapō, he tokoiti nō te tangata i runga i ngā tiriti. Engari ia, he tini makiu tonu te tangata e ora ana i tēnei wā, ka mutu, kāore e ārikarika ana ngā haurangi. Tā wētahi, he whana, he whiu haere i ngā pounamu waipiro ki te kurī nei. Koia anō hoki ka kīia ai he tāone ohooho, moe kore.
I ia ia e kimi kai ana, kāre i roa, kāre hoki i tino tawhiti ka kitea e te kurī hīrokiroki tētahi heihei parai, kua whiua nei e te ringa moumou a te tangata ki te taha tonu o te ara hīkoi. Mōkori anō te kurī nei i tēnei atapō, e kore ia e mate kai. Tere tonu atu ia ki tana kāinga i raro i te piriti, he mahana ake i te mātotorutanga o te takurua. Maringinui ana, inā rā kua tāti te heke iho mai o te hukarere ki ngā tōpito o te ngahere raima nei o NYC.
Atapō, ā, ao noa mai, heke, heke, heke tou mai te hukarere. Kātahi te kurī makariri nei i te mātaratara ki tai! Kua kore e tarea te tū kaha ake ki ōna waewae e whā. Ka takoto anō ki raro me te hūnonoi, te wiriwiri haere nei o te tinana. Kua hoki kaha mai anō te hanga o te waka e whakawhitiwhiti patupatu haere ana i tana kāinga, i te piriti kai runga ake i a ia. Ka mamae anō ōna taringa kua kuia moata haere kē. Mea rawa ake, ka tū kaha ia ki te puta i tana kāinga hoihoi ki te kimi kai e puta ai a pito. Ahakoa he kai pīrau, he kai aha atu nei. Ka āta whetoko te waewae, ka whai atu ko tōna hoa, a, kua whai ake ko ngā waewae o muri. Kua hukarere katoa te papa hīkoi, me te aha, kua rapa ngā waewae ki te papa. Ka uaua kē hoki te hiki kau ake o ia waewae. I ia te wā ka whetoko whakamua, he mahi nui, he rīaka hoki. Ka whai kaha te kurī hīrokiroki nei, inā rā he māia, he ūpoko pakaru kia kore ai ia e mate wheke. Te mutunga mai o te kurī kaha manohi anō, kua kuia haere moata nei a ia nā te kaha hoihoi wawara o raro o te piriti rā. Ā, kua tata kē te tōnga mai o te rā ki runga ki a ia, ahakoa kurī rangatahi tonua nei.
Tae ana ia ki te tāone pū o NYC, ka kite atu i tētahi kuia mangumangu whāngai ana i ngā manu ki te parāoa. Ka āta konihi atu, ka huri te kuia ka karanga atu ki te kurī hīrokiroki nei. Totitoti haere atu me tana arero matekai e tautau ana ki te kuia.
Ka whiua atu he parāoa ki te kurī, horomia tonu atu, ā, kāre ana niho i whai wāhi mai. Ka aroha kē atu te kuia ki te hanga o te kurī, ka awhi, ka mirimiri atu.
Ka kite te kuia i te whakamā me te manawapā mai a te kurī nei ki a ia. Mōhio tou ia he kurī noho tiriti, ka hinga tana ngākau. Inā rā, ka eke te kuia nei ki runga tereina ki haere ki te mahi, ā, whakangaro atu rā ia, e mātakitaki, e ngawē atu ana te kurī.
Ka whāia hunatia atu te kuia nei, tae rawa atu ki te teihana tereina. Ka rapua he wāhi mahana hai haumarautanga māna mō te rangi. Ka au te moe i roto i te mahana o te tini makiu i roto i te wāhi kotahi engari ia, ahakoe te rere tonu a te hoihoi i te takiwā. Ahakoa hoihoi kaha, ka au tou te moe i roto i te mahana o te takiwā nei me te haumarutanga anō o ngā hau kino o te wā o waho.
Nāwai rā, ka oho ake te kurī i te hoihoi a te tangata e puta mai ana i te tereina. Ka arotahi atu te kurī, ka tūpono kite atu anō ia i tana hoa hou, te kuia mangumangu nei. Mea rawa ake, heke ana te kuia ka kotahi atu te kurī ki a ia. Ahakoa, e toru kau ana waewae ka peke tou atu ki te poho o te kuia nei mitimiti haere ai. Mihi atu, mihi mai. Ka toro te kuia ki tāna pēke ka whāngai atu anō i tana hoa ki te parāoa. Me te mea nei, kua roa te tokorua e hoa ana, ā, ka whai whīore atu te kurī i tana hoa hou.
Kai te hapori o te Bronx tēnei kuia e noho ana. Kai roto i ngā huihuinga whare teitei e kīia nei ko te Projects. He kuia mōrehu tēnei kuia, e mōhio whānuitia ana e ngā tāngata katoa o tana hāpori. Nā reira, korekore ana ia e whai raruraru mai i ngā kēnge, ki te nanakia kotahi rānei o tana hāpori. He pera rawa te nui o tōna mana.
Kuhu atu rāua ki tōna whare, kikī pohapoha ana te ruma noho ki te tini ngeru, me te tini kurī. E noho tahi ana hai hapū. He rangona haunga, he hokinga mahara. Ka noho te kurī nei ki te āhukahuka atu ki ngā kararehe maha i mua i a ia, he mahara rerekē ki a rātau. I taua wā rā kua hīrokiroki anō, pēnei i a ia nei otirā, kua pakari kē ake.
Ka huna atu te kurī ki ngā rekereke o tana hoa hou me tana whīore kai waenga i ōna waewae. E wiri ana i te mataku.
Ka tūpiko te kuia ki tana mōkai ka hokomirimiri atu tōna ringa, engari ka whakamā, ka mataku te kurī. Ka hikina atu e te kuia rā, ka awhiawhi kia tau ai te mauri o te kurī hīrokiroki.
Nāwai rā, ā, kua tangata whenua te noho mai a te kurī ki tōna kāinga hou, ki waenga i ōna hoa, i ōna rite anō hoki. I ia ata, i ia pō ka whāngaihia ngā mōkai nei e tō rātau rangatira. Ka kore e roa, kua whai kiko, ā, kua ora, kua pakari ake tōna hanga. Ka ora ake te tinana, ka whai atu ko te āhua o te kurī nei, kai te harikoakoa, kai te pekepeke, kai te hurihuri haere, kai te menemene. Ka tapaina te mōkai hou nei ki a Haramai.
Ka pau tēnā wiki, ka pau tēnā, ka rongo haere ngā mōkai i tētahi āhua rerekē nei i roto mai i tō rātau rangatira. He momo ngārara, he rewharewha pea te āhua. Ka tino pāpouri ngā mōkai, he rongo nō rātau i te mate i roto i te kuia rā, ka rite tō rātau piri tata ki a ia i ngā pō.
Tērā tētahi pō, ka rongo ake ngā mōkai nei i te mamae me te maremare a tō rātau kuia. He āwangawanga nui e haere ana, engari ka kore e taea te pēhea.
Ao ake, ka whāngaihia ngā mōkai ki te kai rangatira, he kai kua tunua, he pūrini hai kīnaki anō hoki, kātahi ka haere i tana haere ki te mahi. Tērā pōhēhē nui tērā. Ka patōtō mai te tatau ka haere te kuia kia te kite ko wai. Kai waho e whanga mai ana, tana takatāpui. Ka tangi, ka awhiawhi rāua, haere atu ana. Inā rā kua ngoikore haere te kuia nei, kua mate ia ki te heke mā te ararewa, kua kore kē e heke whakararo mā ngā kaupae.
Kai te matapihi a Haramai e tangi wēwē ana ki tōna kuia. Ka titiro whakarunga mai ia ki tana mōkai ka tohu atu kia Haramai. Mea rawa ake, ka tapahi atu a Haramai ki te kuaha o te whare, poka tonu atu ia i te kuaha ka rere whakararo ia mā ngā kaupae. Tae ana te kurī ki raro kua ngaro kē tōna rangatira i te tākihi kōwhai. Ka mau atu ngā kamo o Haramai ka whāia māriretia atu e ia. Na ngā mano tākihi kōwhai nei, ka kaumingomingo kē ōna whakaaro. Ka hoki a ia ki te kāinga, ki reira whanga atu mō tana kuia ki reira. Engari tō haere te rā, tau mai ana te pō, auare ake!
Kua mōhio ngā mōkai kua raru tō rātau rangatira. Ka moe tahi, ka moe whakapiripiri rātau ki a rātau. Ao mai anō, ka kuhu atu he tauhou ki te whare, ā, e mau ana i ngā hīnaki kararehe i tana ringa. Ka kite atu a Haramai, ko taua āhua anō rā o nanahi. Ka poka tonu atu ki te tatau, whakangaro atu ana ki te waoku o te ngahere raima o NYC.
Tana kūare hoki, e whai whīoretia ana ia e tana kurī makau, ka titiro whakamuri ki ōna karanga auau. Ka whakatata rāua, ka menemene, ka pūkanakana a rāua mata ki a rāua. Whakawhitiwhiti kōrero ana rāua, ka whai atu te hoa o Haramai ki tōna kāinga ake i raro i te piriti. Tae atu ana rāua ki reira, he tangta kē e moe ana ki tōna whare whakaruruhau. Ka huri ki tana hoa ka auau rāua, ka patua anōtia te ara ki te kāinga o tō rāua kuia. Ka haere atu rāua ki tōna moenga, ka moe atu i reira. Kua kore anō ngā hoa, kua ngaro ki wāhi kē.
Oho ake rāua ki te tangata e kuhu ana ki te moenga, ka kore e taea e Haramai me tana hoa te puta atu, kua katia te kuaha. Heoi anō, tēnei tangata mei kore ake te āhua o tō rāua kuia, ka kore e tino mataku atu. Karanga atu ana te tangata nei i tō Haramai ingoa. Ka āta haere atu a ia. Ka tū, paku noa tana whakatata atu, ko tana hoa e mātakitaki ana he aha te aha, he aha ka pūawai mai.
Ka hokomirimiri atu te tangata i a ia, ka tau haere tōna mauri. Ko tana hoa ano tēnei e whai hokomirimiri anō māna.
Kua mārama nei rāua, he tangata atawhai kē tēnei tangata, ā, ka oko anō hoki i te whakapapa o tō rātau kuia e rere ana i te tangata nei, ka tau. Waihoki, kua mōho anō hoki ēkene kua mate atu he tētē kura, ā, kua tau mai nei he tētē kura.
Ka haria rāua ki te kāinga hou o te tangata nei. Kuhu ana, kikī ana ngā pātū ki ngā whakaahua o tō rāua kuia, he tangi hoihoi, he ngawē atu tā rāua ki ngā whakaahua nei.
Ka noho te tangata nei, ka kōrero i te reo tangata ki ngā mōkai me te hokomirimiri atu anō. Kua mōhio tonu atu rāua kua hinga te Tōtara nui i te momo ororeo o tā rāua kaitiaki hou. Kua hora te mamae hai kai mā te ngākau! Moe tata ake rāua ki a rāua i taua pō. Ao ake, e kuhu ana te tangata nei i ngā kaka taiēa, pangopango nei. Ka herea ngā kurī ki te taura hīkoi ka haere tahi atu rātau ki te urupā kai kō tata mai i tō rātau kāinga.
Haere ana ngā karakia, ngā waiata tangi me ngā whaikōrero, ka tanumia ki te kōpū o te whenua. Kātahi ka puta te reo tangi hoihoi o te katoa i reira e taki tū ana, pēnā mai anō ngā kurī. Mea rawa ake, kua oma atu a Haramai i tōna rangatira hou, ka taiperepere atu te taura i te ringa o tana kaitiaki. Oma atu, oma atu kāre mō te paku titiro whakamuri, ā, e tōia ana te taura ki te papa.
Ka hoki atu a Haramai ki te teihana tereina, ki te wāhi i tūtaki tuatahi ai i a ia tōna kuia. Ka hoki ki te moe.
I te wā e ora tonu ana te kuia, ka haria a ia ki ngā wāhi kai reira e hora ana ngā toenga kai maha o ngā whare kai, hai kai māna. Me te mea nei, kua mōhio kē te kuia, nōna e ora ana ka kore e hiahia ana te kurī te noho atu ki tētahi kē. Me te aha, i whakaritea māriretia mai te kurī ki te wā ka tō ai te rā ki a ia. Ka taka te kapa ki a Haramai, ke menemene auau atu ki te pō.
Hoki atu ia ki te teihana tereina ka tatari atu ki reira ki te putanga o ngā tāngata hoki ki ō rātau kāinga i te mahi, mei kore ka puta atu anō tana kuia.
Ono karaka i te pō, ko te tereina hoki o te kuia ki te teihana. Rā atu, wiki atu, marama atu, tau atu, hokihoki atu ai a Haramai ki reira, tatari mai ai mō tōna kuia otirā, auare ake. He mōhio kē a Haramai, āhea rawa tōna kuia e hoki mai ki te ao kikokiko. Nā te kaha o tōna aroha mō tōna kuia, me tana piripono hoki, ka hoki mai anō a ia, hokihoki atu ai ia ki reira, ā, mate noa!
Nā tana kore hoki ki tōna rangatira hou ka kore ia i mōho he uri āna kua whānau mai i tana makau rā. E rua ngā kūao ka puta i a ia. Ka tapaina ko Te Hokingamai rāua ko Piripono. Ka piripono anō rāua ki tō rāua rangatira, ā, mate hirinaki atu.
Kua whakairo nei te rongonuitanga a Haramai ki ngā ngutu o te makiu e noho mai ana ki te Bronx, taka rawa atu ki tērā taha o te piriti nui, whakawhiti atu ki te tāone nui o New Jersey. Kātahi te kurī kaha, kurī piripono ko Haramai.