Kīhai te kaituhi i mōhio ka pēnei rawa te pūtanga mai o tētahi tuhinga auaha i a ia, hēoi, mēnā ko te puta te puta, ā, tēnā, me whakaputa i a ia kia ea rā anō te korikori o whakaaro i āna whakaawenga i te taiao i noho ai te kaituhi.
Papaki kau ana ngā tai o te aroha
Ki te tau o te ate
Kōmuri aroha
Taitimu, taipari, taiaroha
Taihoa e haere, te auaroha
Kei tātahi au e tau ana ki tētahi wāhie roa me te mātakitaki i te tai e āta huhura atu ana ki te-au-i-tawhiti. Pōruturutu kau ana ngā ngaru iti, ka pāheke atu anō ki tōna pūtake, ā, ka āta huri, ka āta huri te tai. Hēoi, ka titiro whakarunga, me te kite atu i tētahi ngaru kaitā e whakarite mai ana kia rutua paitia te oneone. Ka piki, ka pupuke, ā, ka rurutu tahi ko tōku ngākau. Pao! Ka rutu hoki a mahara ki te mokemoke, ki te māharahara hoki mō te ngarohanga o te aroha i a au.
Ka pao te kanohi mō te wā i piri māua ko taku whakareka me tā māua tūpono ki tēnei mea te kōmuri aroha. Ka rere ngā whakaaro ki te wā i a māua, oti rā tā māua ruku ki te tai o te aroha. Ka huri anō ngā whakaaro ki te wā i wehe māua i ngā marama tata nei me tā māua haukoti i ngā painga o tō māua aroha. Kapi ai ōku karu kia purutia ngā roi ka heke mai i te takahanga mai o aua whakaaro ki a au. He mahara kotahi, he roi kotahi, ā, ka rurutu anō te manawa me taua ngaru kua kōrerohia nā. Pao!
Ko te pō tō māua wā, ā, ko wānanga, ko kōrero urunga, ko kōrero pono hoki te ōwhititanga o tā māua piringa. Ka hipa haere ngā tau, whai kaha ai māua kia tū taikākā ō māua manawa me ērā atu āhuatanga e haere ngātahi ana me te aroha. Tūwhera haere au i ngā kūaha kua roa nei e here ana ki te raka, mō te tūpono ka kitea tōku katoa. He kauawhiawhi, he kōmirimiri te kōmukutanga i ngā here o te wā e wātea pai ai tōku wairua, i tōna anō hoki. Koia, ko tōna ngākau mahaki hei pikinga waiora mōku, ko au tonu ki a ia.
Tēnei mea te aroha, he pakanga tonu, he whawhai tonu mō te tangata i ētahi wā. Ehara i te mea ka tau noa mai ia me āna whakaritenga katoa. Me arotahi te tokorua ki a ia, oti rā, me tūwhera te whatumanawa ki te whakarongo, ki te kōrero, me te wānanga hoki i ngā haukotitanga o te au o te aroha. Taka mai he wā i tae atu māua ki te taiwhawhatitanga o ngā raruraru, ā, nā ngā whiunga i tai i pūpū ake ai ō māua raruraru. I te mutunga iho, ko māua anō te ika o tā māua pakanga i uta. I konā, whakaae māua kia wehe.
Ko te auripo nui i pā mai ki a au i tā māua wehenga, ā, i te kōmingo tonu ahau mō tētahi wā me taku mate ki te raparapa haere i te au e noho tahi ai a ngākau rāua ko hinengaro. E tohutohu ana a Hinengaro kia ū tonu ki tāku i kī ai, engari anō a manawa e mamae ana i te korenga o tāna e hiahiatia ai, me taku tino pīrangi kia māriri tōna marū. Ko te marino o te tai te kite nei au. Kei te pākīri mai a Tamanuiterā hei romiromi i tōku tinana. Ko te hau kōhengihengi e hīnawanawa ana i tōku kiri. Ka paku kata ki a au anō i te tauaro o ngā kare ā roto e hopu ana i a au, me te taiao e mihi mai ana ki a au i tēnei wā tonu. E whiti te rā, e haku! E whiti te rā, e haku!
Māna, me rite tonu pea taku ngākau ki te tai e tere kārohirohi ana i te ākau roa – me hura tonu, me whanake tonu. Me pakari pea taku tū, anō ko ngā hihi o Tamanuiterā, hei oranga mō tōku tinana. Me whai i tā Tawhirimātea e mea mai ana – ahakoa te hau me kaua rawa ahau e noho wiwini i te ao hurihuri.
E pērā ai, me whakairi pea ngā rau whakaaro ki tōku whakareka ki ngā kokona o tōku ngākau kia kore ai ērā māharatanga e kitea.
Kia tahuri atu pea te ngākau e mau nei i te kino ki te kimi hoa haere anō mōna. Mā te wā pea e tohu mai ai ki hea tēnei auaroha haere ai, engari mō te wā tonu nei, i a au e tau ana ki tātahi, ki tēnei wāhie roa, ka taea te kī – ka whakaurupā taku aroha mōna.
Kāti au i kōnei.